Vawiin hian SSA Mission Serchhip District buatsaih Rashtriya Avishkar Abhiyan Quiz Competition on Science & Maths Final chu P&E Veng YMA Hall, Serchhipah neih a ni a, District Bawrhsap Pi Sangchhin Chinzah chuan khuallian niin he hun hi a hmanpui.
Bawrhsap chuan thusawiin, tunhma deuh chuan Mathematics leh Science hi Mizo tawnga min zirtirtu tur an awm thin loh avangin subject harsa niin kan hre fo thin a. Tunlai zirlaite erawh chuan chu harsatna chu tawk tawh lovin zirtirtu tha tak tak an nei tawh a, an vannei hle ani, a ti a. Zirlai naupangte chu Science leh Mathematics thiam tak nih ngei tum tura fuihin, heng subject pahnihte tel lo chuan khawvel hmasawnna hian thui tak ke a pen thei lo a ni tih hre reng turin a chah a ni.
Pu Lawmawma, District Education Officer pawhin thu sawiin naupangten zirlai harsa an tih ber thin chu Mathematics ni fova, chu harsatna sut kian nan chuan ‘Hmun’ thiam hi thil tul hmasa ani, Mathematics leh Science atan a pawimawh em em a ni, a ti a. Arts subject hi thlauhthlak tur ani hauh lo nain, tunlai zirlaite tan chuan Pawl 12 thleng tal Science subject zir hian hma lam hun atana puitu tha tak anih thu a sawi bawk.
He hun kaihruaitu Pu Vanlalchhana, DPC, SSA Mission Serchhip leh SDEO Serchhip ni bawk chuan Quiz Competion buatsaih anih dan sawiin, Rashtriya Avishkar Abhiyan hi naupang ten nuam ti taka Science leh Mathematics an zir theihna atana hma lakna a ni a. He Competition hian naupangte phurna thar a pek ngei an beisei thu a sawi.
Kumin October thla atang khan cluster level intihsiakna hi kalpui tan ani a, chuta ti tha te chuan November thlaah Block levela intihsiakna hi nei lehin chuta tang chuan a ti tha zual School 4- Presbyterian English School, Serchhip, Presbyterian English School, N. Vanlaiphai, Chhuanthar Middle School, Baktawng leh Chawngbuangi Memorial School, Serchhip ten vawiin hian intihsiakna neiin, Presbyterian English School, Serchhip aiawhte 1na niin, 2 na Chhuanthar Middle School, Baktawng leh Presbyterian English School, N. Vanlaiphai te an ni a, Chawngbuangi Memorial School, Serchhip ten lawmmna 3na an la ani. Lawmman atan hian Certificate leh pawisa fai hlan an ni bawk a ni.
