Vawiin khan Indian Medical Association (IMA) Mizoram State Branch chuan Aijal Club-ah Annual Conference vawi 43-na an hmang a. Dr R.Lalthangliana, Health Minister chu khuallian a ni. Kumin IMA Annual Conference thupui atan “Ending the HIV&AIDS Epidemic: Community by Community” tih thupuiah an hmang.
Dr R.Lalthangliana chuan sawrkarin Health Sector a ngai pawimawh a, Mizoram sawrkar hmalakna pui ber SEDP ah pawh health a dah lian hle a ni, a ti a. Health hmasawnna turin sawrkar a inhawng a, hmasawnna ruhrel din kawngah pawh nasa takin tan a lak thu sawiin Minister chuan Zemabawkah Cancer Super Speciality Hospital siamna tur te, ZMC tihchangtlunna tur te, RIPANS hmasawnna tur leh Mizoram chhunga damdawiin hrang hrang leh hriselna kawnga hmasawnna tur lam chi reng rengah theihtawp chhuah sawrkarin a inhuam a ni, a ti. Dr R.Lalthangliana chuan doctor leh nurse te chu mipuite tana rawngbawltu, hna pawimawh leh zahawm tak thawktute an ni a, an thiamna leh theihna mipui tana hlan zel tura fuihin medical science thiamna piahlamah an tawngkam tha ringawt pawh damlo te tan damna a tling thei tih hriaa he rawngbawlna an thawh mekah inhlan thar zel turin a fuih.
Conference hawnna programme hi IMA President Dr.Rosangliana’n a kaihruai a, Honorary Secretary Dr Chawnglungmuana chuan an pawl hmalakna hrang hrang report a pe. IMA Mizoram State Branch hian member 33 an nei a, intern member thar 15 an nei bawk. An member ni sa zingah Specialist (MD/MS) zirchhuak thar mi 15 an awm a. Kumin chhung hian IMA Headquarters atangin IMA Special Award for Organizing (IMA North East Leaders Meet Conclave) leh President Appreciation Award (for IMA Membership Drive Trophy) an dawng a ni.
An pawl hian thingtlang lamah Special Clinic an buatsaih thin a, khawl leh hmanraw hrang hrang nen damlote a thlawnin an en thin. Medical thiamna lama hmasawnna turin an member-te tan seminar hrang hrang an butsaih thin a, tun tum Conference ah pawh hian HIV leh AIDS chungchang chipchiar takin an zirho a ni.
