Rural Development Minister Pu Lalruatkima'n mipuite hnena a lo sawi tawh angin December Ni 13, 2019 khan MGNREGS mipui inhlawhna sum la pek loh chu Krismas Present atan Central Sawrkar chuan cheng Nuai 8867 a rawn sanction belh.
Kumin August thla atang khan MGNREGS hnuaia inhlawhna hi Central Sawrkar-in pawisa a rawn pek hleih theih loh avangin Job Card holders leh khaw tam tak a VC-te chu an mangang hman hle a. He harsatna hi hria in Pu Lalruatkima, RD Minister chuan December Ni 6, 2019 khan Delhi-ah amah ngei zuk kalin Ministry of Rural Development a Secretary, Pu Amarjeet Sinha a Office-ah a zuk hmu a. Mizote hunpui Christmas lo thleng turah chhungkaw tin sum mamawhna san lai anih avangin Krismas hma ngeiin he sum la bat hi release turin a ngen a. RD Minister ngenna hi ngai pawimawhin sum hi release a ni ta a ni.
Heng sumte hi mipui account-ah direct-a lut tur a ni a, Mizoram pumpui a Job Card nei awm mek chhungkua - 197127 te tan ni 21 inhlawhna a daih a. Tunah hian MGNREGS hnuaiah hian Mi pakhat in nikhat ah Cheng 211/- an hlawh mek a ni.
December ni 2, 2019 khan Cheng Nuai 5382 lai Central-in a rawn sanction tawh bawk a. Heti hian kumin 2019-20 chhung a mipui inhlawhna tur atana MGNREGS hnuaia Central Sawrkar in an rawn sanction tawh zawng zawng zat chu Cheng Nuai 43118 lai a ni ta a ni.
Mizo mipuite hunpui Krismas awm tura kan inpuahchah lai leh sum mamawhna san lai taka mipui inhlawhna an rawn sanction hi Pu Laruatkima RD Minister chuan lawmawm a tih thu a sawi.
