Tukin khan Children Sanitation Club, Mamit Bazar vengte kum 3 tlin lawmna neih a ni a. Pu C. Sawihlira, District Urban Development Officer chuan a telpui.

Pu C. Sawihlira chuan UD&PA hnuaia din Bazar veng Children Sanitation Club te'n kum 3 lai mai Mamit Bazar veng faina kawnga hmala tura an lo ding ta chu lawmawm a tih thu a sawi a. CSC Bazar veng hmalakna chuan an veng chhungah pawh rahtha  chhuahin Bazar leh a chhehvel enkawl leh vawnna kawnga hmalakna chu lawmawm a tih thu sawiin. Faina leh thianghlimna kawnga hmalakna mai bakah midangte zirtirtu an nihna chu fakawm a tih thu a sawi a. He pawla tel tirtu naupang nu leh pate chungah lawmthu a sawi a ni.

Pu C. Sawihlira, DUDO hian Mamit khawpui chhunga veng thenkhat Venghlun leh Dinthar vengte tan Children Sanitation Club a hawng thar bawk a ni.

He hun hi Pi Laltharzeli President MHIP Bazar veng chuan a kaihruaia, Bazar veng Children Sanitation  Club dincham chu Ni 15.12.2019 niin Pathianni a nih avangin Inrinniah hman a nih thu a sawi a. DCPU Office atangin Naupangte thutiam sawirualna neih a ni a. Chhimveng YMA President, Bazar veng VCP leh Hmarveng VC atanga Sanitation Chairman leh Venghlun YMA President atang te'n thusawi ngaihthlak a ni bawk. Mamit khawpui chhung naupang thahnem tak an tel a ni.