Tukin zing khan Health Minister Pu Lal Thanzara chuan High School Field, High School Field, MacDonald Hill-ah Infant Mortality Rate (IMR) grant atanga lei Bolero 14 chu a vailiam. Nausen kum khat hnuailam thihna tihtlem kawnga Mizoramin hma a sawn avanga 13^th Finance Commission-in Incentive Grant a pek atanga lei a ni a. Heng lirtheite hi monitoring leh supervision atana hman tur a ruahhman an ni.

Minister Pu Lal Thanzara chuan nausen kumkhat hnuailam thihna in tlem lam a pan chu thil lawmawm a nih thu sawiin, hemi kawnga hmasawnna hmuh zel a nih theih nan motor lei thar chu hmanraw tangkai a nih a beisei thu a sawi a. Motor thar leite chu a kawltuten mahni nawmsakna atan leh tullo a hman tur a nih loh thu leh, thingtlang hmun kilkhawr tak tak a awmten an tangkaipui tura lei a nih zawk thu a sawi a. Nu nau nei turte damdawiin pan pui leh, nau neih fel tawh hnu a in thleng man chawi miahlova thlah a nih theih thu Minister chuan sawilangin, nausen thi zat titlem turin Health Department hnuaia thawk hmun tin a awmte chu theihtawp an chhuah a duh thu leh, chutihrual chuan nau an hrisel zawk nan nu nau paite pawhin fimkhur leh inuluk nachang hria a, zuk leh hmuam laka fimkhur nachang an hriat a duh thu Minister chuan a sawi bawk.

Motor vailiamna hun hi Dr. Rohmingthanga Ralte, Director of Health Services ina kaihruai a. Dr. K. Ropari, Principal Director, Health & Family Welfare chuan motor lei dan a nih chungchang a sawi a. NHM hnuaia motor lei te ambulance a leh (convert) vek anih avangin monitoring lamah hman theih a ni tawh lova. 13^th Finance Commission-in Incentive Grant atan kum 2012-a sum hmuh atang khan Monitoring and Supervision atan hman tur motor leina tur dah hran a nih angin thingtlang lama thawktu pawimawh Chief Medical Officer/Senior Medical Officer-te leh Community Health Centre/Primary Health Centre-a doctor-te, a hmun ngeia hriselna lam thutchilh tuten chak zawka hma an lak theih nan motor chu lei a ni a. Bolero 26 lei turah 14 chu vailiam a ni ta a, damdawi supply tur motor dang pawh book mek a ni.

Vawiina motor vailiam-te hi District tin CMO bakah Chawngte SMO, Buarpui PHC, Kawrtethawveng PHC, Biate PHC, Lungdai PHC leh N. Vanlaiphai PHC a hman turte an ni.