Vawiin chawhma dar 11.30 khan Food, Civil Supplies & Consumer Affairs (FCS&CA) Minister Pu John Rotluangliana chuan Bairabi-a Food Corporation of India (FCI) kudam chu a tlawh a; kudam tualzawl leh a chhuntu kawngpui chhe lutuk avanga buhfai phurh luh leh phurh chhuahna lama harsatna thleng thinte a hmunah chipchiar takin a fang a ni.

Pu John Rotluangliana chuan FCI kudam luhna leh a panna kawng chhe lutuk chu siamtha thuai turin FCI hotute a hrilh a; FCI lam hian kudam luhna leh chhuahna kawngpui leh tualzawl te chu cement concrete-a an siam that mek thu leh, furpui a rei avanga hna a chak theih loh thu an lo hrilh a. Minister chuan FCI contractor chu thla khat chhunga an hna zo hman tura hrilhin, thla khat a vei hnuah amah ngeiin a enfiah leh tur thu pawh a hrilh nghal a ni. Pu John Rotluangliana chuan amah tawiawmtu Kolasib PWD EE Pu Lalhmingsanga hnenah FCI area chhung chu Mizoram sawrkar enkawl ni lo mah se, rel kawng siamthat a nih dawn avanga buhfai chhekkhawl kawnga induhthawhna a nasat avangin kudam luhna leh chhuahna kawngpuite chu a theih anga lo chei thatsak turin a hrilh bawk a ni. Supply Minister chuan, "Rel kawng siamthat hun chhung chu motor hmanga Bairabi-a FCI Kudam-ah hian buhfai chhekkhawl a ni deuh ber dawn a, chuvang chuan, Mizoram sawrkar kut ni lo mah se, buhfai eitu turte hi keimahni kan nih dawn miau avangin FCI leh Indian Railways enkawl kawngpuite pawh hi thahnemngai taka kan siamthatsak a tul a ni" a ti. Bairabi-a FCI kudam-ah hian buhfai metric tonne 5000 chhek theih a ni a, tunah hian buhfai metric tonne 3160 a awm a; mega-block tan hnuah hian Byrnihat atangin buhfai phur motor lian trip 44 a lo thleng tawh a ni.

Pu John Rotluangliana hian Bairabi-a Supply department kudam pawh a tlawh nghal a; he kudam atanga hian Bairabi tualchhung bakah khawper 4 hnenah buhfai pek chhuah thin a ni a; tunah hian buhfai quintal 1004.80 an chhekkhawl a ni. Tourism Minister a nih angin Pu John Rotluangliana chuan Bairabi-a tourists' lodge chu a tlawh bawk a; Tourism Department-in Mizoram puma Tourists' Lodge 16 a enkawl mek te chu privatise tum a nih thu leh, tender koh mek a nih thu a sawi a. Kolasib district chhungah Bairabi, Vairengte leh Thingdawl-a tourists' lodge-te chu mimal enkawl tura ruahman mek a nih thu a sawi lang bawk. Supply Minister hian Bairabi khawdaia Kheva kai/motor-boat kaia Kolasib leh Mamit district inkalpawhna tura Tlawng lui chunga lei dawh mek chu a tlawh bawk a. He lei dawh hna hi a muan em avanga chak taka kalpui dan tur Kawrthah EE, PWD chu a sawipui nghal a. Kawrthah EE, PWD chuan lei dawh mek chu chhunzawm zel turin a him tawk ngei tih National Institute of Technology (NIT), Guwahati-a mithiamten an enfiah tawh hnuah, NIT, Kolkata lam ngaihdan an lak mek thu leh, a chhanna an la hmuh loh thu Minister hi a hrilh a. Lui laia ban phun chu a awn deuh avangin Mizoram PWD chuan hriatfiah duh an neih thenkhatte zawhfiah an tum mek thu Kawrthah EE, PWD chuan a sawi bawk.

Pu John Rotluangliana hi FCS&CA Addl. Director Pu C. Zasanga te, Pu Lalhmingsanga Kolasib EE, PWD te, Pu Zohmingliana, DCSO, Kolasib leh Pu Robert Thangmawia DIPRO, Kolasib ten an tawiawm a ni.