Kum 2018 December ral hmaa India ram puma naupang kum hnih hnuailam leh nu naupai 90% in hri danna (vaccine) an dawn kim hman theihna tur ram pum huap hmalakna, Intensified Mission Indradhanush chu tukin zing khan Health & Family Welfare Minister Pu Lal Thanzara chuan Chief Minister’s Office kawtah a hawng. Intensified Mission Indradhanush hi India Prime Minister Pu Narendra Modi chuan nimin (8.10.2017) khan Gujarat-ah a hawng a, state tinah he programme hi hawnna neih tur a nih angin leh, October ni 8 hi Pathian Ni a nih avangin Mizoramah chuan vawiin hian hawnna inkhawm hi neih a ni ta a ni.
Health Minister chuan IMI in a tum ber chu hridanna “Inchiu (Vaccine) in natna a ven theih lak atangin tu naupang mahin an nunna an chan tur a nilo” tih a nih thu a sawi a. Kum 2014 December thlaa India ram puma Mission Indradhanush kalpui tan a nih atangin naupang tam zawkin an chhawr tangkai zawk theih nan huam zau zawk a hma la tura Intensified Mission Indradhanush chu neih a nih tak thu leh, Mizoramah pawh IMI hi High Priority District – Lawngtlai, Lunglei leh Mamit-ah te hma lak a nih tur thu a sawi a. Minister Pu Lal Thanzara chuan mahni fa ten hri danna hi an lak tir vek chuan nunna chan theih natna lak atangin man loin an chhan theih thu mipuiin hre tura a duh thu leh, mahni awmna sub-centre hnai berah he invenna hi an lak mai theih thu a sawi a ni.
Vawiin Intensified Mission Indradhanush (IMI) hawnna inkhawm hi Dr. Rozama, Mission Director, National Health Mission chuan a kaihruai a. Dr. Lalzawni, Programme Officer chuan kum 2015 atanga Mizorama Mission Indradhanush kalpui tan tawh chu thawh li (phase 4) zawh a nih tawh thu leh, a thawh nga na tur hi Intensified Mission Indradhanush (IMI) hian chhunzawm a nih tur thu a sawi a; phase hmasa lama hmaih palh emaw awm thei zawng zawng chu IMI hian a tuam kim tura beisei a nih thu a sawi a. Lunglei, Lawngtlai leh Mamit District chhungah IMI hi session 109-ah neih tum a ni.
Intensified Mission Indradhanush hi thla li (4) chhungin khaihlak awm lo a inzawm patin India Hmarchhak district 52 atanga hmun thlan bik 166-ah leh India ram state 21-a thingtlang khuaah te kalpui a ni ang.
