No.1324/2020-2021  

Vawiin khan Health Minister Dr.R.Lalthangliana chuan Lengpui Airport tlawhin khawsik enna changkang chi, 'Thermal & Optical Bi-Spectrum', Lengpui Airport-a dah  tura bun mek chu a endik a.  Lengpui Primary Health Centre (PHC) pawh a tlawh nghal bawk a ni.

Health Minister hian Thermal & Optical Bi-Spectrum dahna tur hmun te enfiahin  India ramah Delhi, Bangalore leh Thiruvananthapuram Airport te dawtah hetiang khawl dah thei Airport palina kan ni hi thil ropui leh lawmawm atak a ni a ti a. Hetiang hmanraw changkang, Lengpui Airport-ah a lo thleng hi hmasawnna ropui tak a ni a. COVID-19 laka kan invenna kawnga hmanraw pawimawh tak niin khualzin lo lut a piangte khawsik an neih leh neihloh awlsam tak leh rang takin kan lo test zel thei tawh dawn a, hemi hnu ah hian Airport a screening point dangah Rapid Antibody Test tih chhunzawm a ni ang a, rinhlelh kan neih pawhin sample lakna tur pawh Airport ah vek hian kan peih fel vek tawh a ni, a ti. Lockdown vangin hun rei tak Airport hi kan hmang tawh lo a, kan hmang leh tan dawn ta a, kan fimkhur hle a ngai a. Heng thil kan leina tur sum mamawhte phal taka min petu kan Chief Minister chungah pawh lawmthu ka sawi nghal a ni, a ti a. Lengpui Airport a Thermal & Optical Bi-Spectrum Camera aia te deuh leh ken awlsam zawk Handheld Thermal camera pawh Bairabi leh Vairengteah kan dah thla bawk a. Kan Chief Minister remruatna in Lengpui Airport hi India ram Airport zinga screening a ti hmasa ber leh Lockdown ti hmasa ber kan ni, a ti.

Health Minister chuan tunah hian Mizoram chu COVID-19 lakah kan him rih chuan kan hria a. Lengpui Airport bakah Vairengte, Bairabi leh hmun dang atanga lo lut mek leh lo lut turte chu, sorkarin dan leh hrai kan sahimna tura a siamte tha tak leh thuawih taka zawm vek tura chahin, keimahni, kan chhungte leh kan vaia him tlanna tur a ni tih kan hriat a tul a ni, a ti a. Kohhrante pawh an hmunhma te quarantine-na hmun atan phal taka an pek avanga lawmthu hrilhin,  kan u leh nau lo hawte hi thinlung takin kan lo lawm che u a, sawrkarin remruatna a siam a, kut thinga inchibai leh inhnaih lutukte hi a rem rih lo a ni tih hre reng ang u, a ti a. Quarantine lai leh quarantine hnu ah pawh an tih tur leh tih loh tur hre reng turin a chah bawk a ni.

Health Minister chuan COVID-19 vei ni a rinhlelhte RT-PCR hmanga swab sample test zung zung a nih theih nan mithiamte nen inrawn tlan a nih hnu ah ZMC a COVID-19 testing laboratory chuan pooled sampling technique a hmang tawh dawn a, karleh atangin nitin swab sample 100 vel a bul tan nan test phawt tum a ni, a ti.

Health Minister hian Lengpui Airport leh Lengpui PHC ah te hian, Mask – 500 ve ve, Gloves – 500 ve ve, Hand Sanitizer Litres 20 ve ve, N95 Mask – 100 ve ve, PPE – 100 ve ve leh Rapid Test Kid -100 ve ve a pe nghal a ni.

India hmarchhak state zingah Mizoram chu Thermal & Optical Bi-spectrum Camera nei hmasa ber a ni a, he Thermal Camera hmang hian meter hnih danah khawsik leh sik loh a entheih a, a rualin mi 10 vawikhatah a endik theih dawn avangin khualzinte tan pawh hun a heh loh mai dawn bakah rang takin he Thermal Camera in a lak data te leh ID te chu email leh whatsapp hmangin COVID-19 lam buaipuitute a thawn zung zung thei nghal tawh dawn a, alo endiktute tan pawh meter hnih dan atanga a nih tawh dawn avangin a him viau tura ngaih a ni a. Vawiin khan he khawl hi hman theih turin bun fel a ni. Hemi rual hian Handheld Thermal Camera pali lei a ni bawk a, Health Minister sawi angin State dang atanga luhka lian zual deuh Bairabi leh Vairengte Screening Centre a hman turin thawn a ni tawh a, hei hian nasa taka mihring lo lut tur endik kawngah a puih beisei a ni.