No.451/2021-2022 

Aizawl, 8th May, 2021: Vawiin chawhnu khan Health Minister Dr. R.Lalthangliana chuan Lengpui-a Community Covid Care Centre (CCCC) atana hman mek Government Middle School-I tlawhin hemi hmuna duty te nen an inkawm a, Minister hian CCCC mamawh chi hrang hrang PPE kit, Hand Sanitiser, Face Mask bakah theirah Apple leh Grape a pe a, Oxgygen Concentrator leh damdawi thahnem tak bakah sumfai a hlan a ni. Apple leh Grape-te hi  Nghalchawm leh Lengpui Airport-a Covid Duty-te a pek kep nghal a ni.

Lengpui CCCC-ah hian Doctor leh Task Force duty-ten Minister hi lo dawngsawngin, Dr. Thangtea chuan Lengpui hi Mizoram luhkapui ber pakhat a ni a, nitin phai lam atanga zin haw thlawhtheihna rawn tum thinna hmun a nih vangin tunlai boruakah phei chuan thawktute tan pawh fimkhur a ngai lehzual em em a ni, a ti a. An hnathawh mek chu mihring hriselna leh nunna hial thapa thawh ngai a nih vangin tlawmngaihna leh mihringpuite hmangaihna tak tak nen lo chuan thawh ngam chi a ni lo, a ti a. Mizoram puma COVID-19 hri kaite enkawlna hmuna duty te leh Frontline / Healthcare workers zawng zawngte hnathawh chu ropui a tih thu sawiin, Zoram mipuite pawhin an tan bang lova kan tawngtai a ngai a ni, a ti.

Lengpui CCCC a tlawh hnu hian Minister hian Lengpui Airport-a duty te tlawh lehin inkawmhona hun tha tak an hmang a, Airport-a duty te hian an mamawh chi hrang hrangte Minister hnenah hian an lo thlen a, Minister chuan puih an ngaihna leh an mamawh angte chu lo ensak a tiam a, an harsatna tawhte leh mamawhte chu inthlahrung lova sawi zel turin a hrilh a ni. 

Minister hian nimin lamah Union Health Minister Dr.Harsh Vardhan chu telephone-a a biak thu sawiin  India ram State 18 chauha pek tur COVID-19 hri kaite enkawlna damdawi man to 'Tocilizumab' an tih vial khat ringawt pawh cheng singnga man chu vial tam tak Mizoram tan pe tura a nawr thu a sawi a, Tocilizumab vial khat hi black market-ah phei chuan cheng nuai khat leh singnga lai ten an zuar a, Union Health Minister chuan Ministry of Petroleum hnuai atanga inpek tur a nih thu min lo hrilh avangin Petroleum Ministry-ah DO Letter ka ziak nghal a ni, a ti a. Union Health Minister hnenah hian Covid Vaccine kum 18-44 chin chu a thlawna pek kan tum thu ka hrilh bakah kum 45 chin chunglam pawh vaccine la lo an la tam avangin tam tham deuh Vaccine min rawn thawn thuai turin ka ngen a, DO Letter ka thawn nghal bawk a ni, a ti.

Minister hi Aizawl West CMO Dr.Thani Pachau-in a tawiawm a, CCCC a duty te leh Task Force-te chuan Minister in a ngaihsak avangin lawmthu an lo hrilh a ni.


Attachment

  • Loading attachment...