Vawiin chawhnu khan damdawi in thar LRM Hospital, Ramhlun Venglai ami chu Health Minister Pu Lal Thanzara’n a hawng. 

Hawnna inkhawmah thu sawiin Pu Lal Thanzara chuan LRM Hospital thar hawn a ni ta chu lawmawm a tiin sawrkar damdawi in ten mipuite mamawhna a dawl zawh tawh loh avangin mimal din damdawi in  thar a awm leh thei ta chu damlo te leh ram tana malsawmna a ni, a ti a. Mimal damdawi in te chuan sawrkar ko an ti zang khai mai piah lamah sawrkarin hna a pek sen loh mi tamtak te eizawnnna siamtu an ni leh zel chu fakawm tiiin rawngbawlna pawimawh tak a ni, a ti a. Damdawi in din chu sumdawnnna ni loa mi hnuaihnung zawk leh chhumchhia te tana rawngbawlna remchang tak a ni  tiin hemi kawngah hian CMC Vellore te leh tun hnaia boralta Dr.Ruth Katherine Martha Pfau, German Christian nu a hun hlu tak Pakistan rama damlote tana hlantu angte hrerenga entawn turin a chah nghal bawk a ni. Thahnemngai taka damlo te hmangaihna leh lainatna nen an mangannna te phurhpui mai duh tawk lova  phurh sak zawk thin turin thawktu te chu chah a. Tihdam rawngbawlna chu hna ropui leh zahawm a nih thu sawiin hlawh hmuhna leh hlawkna um nan thawh chi a ni lo va, hmangaihna leh dawhtheihna nena thawh chi zawk a ni,  a ti. 

Health Minister chuan H&FW Department hmalakna te tarlangin District Hospital zawng zawngte tih changtlung tura hmalak mek a nih thu te, Referral Hospital a Medical College din te, Zemabawk Cancer Hospital thuam that hna chak taka thawh mek a nih thu te, Mental Hospital din tura  hmalak mek a nih thu leh IMR leh MMR te tihniam tura tan lak a nih thute a tarlang a. Natna pumpelh tura hmalak chu mitin mawhphurhna a nih thu leh mipui nawl puiin hemi kawnga tan an lak theih nan a beih hi sawrkar lam mawhphurhna a ni ve thung a ni, a ti a. Mipui ten nun hrisel zawk an lo neih theihna tur atan eitur leh khawsak dan hrisel kan neih angaih thu sawiin hein hi kan nunpui chuan natna tam tak kan pumpelh thei dawn a ni, a ti a. Sawrkar lam pawhin hemi kawngah hian tan nasa taka lain programme thar heng; National Deworming Day, Integrated Diarrhoea Control Forthnight, World Population Day leh World Cancer Day te urhsun takin a hmang chho ta zel a, pawna inthiar awm  lohna tura hmalakna ‘Open Defecation Free (ODF) a District tin te puan a nih theihna tura beihna te pawh hi a huam vek a ni, a ti a. Pu Lal Thanzara chuan phailam atanga Daktawr thiam chah chhuah thin a ni chu phailam panna neilo te tan a that viau rualin damlo te hmakhua ngaih aia sum siamna lama kal nat zawkte a awm theih  avangin hetianga mithiam chah chhuah kawngah hian Health Department thuneitu te hriattir hmasak thin ni thei se a tha a ni, a ti a. LRM Hospital chu damdawi in hrisel tak bawlhhlawh sawngbawl kawngah leh vawnfai kawngah pawh mite tana entawn tlak ni turin a chah a. Hospital hawn thar tak chu mite tana malsawmna ni a, sawrkar thawhpui a, harsatna an neih te a hnena thlen hreh lo turin a chahin an kalzelna turah duhsakna a hlan nghal a ni.  

LRM Hospital-ah hian tun dinhmunah thawktu 108 an awm mekin  Department hrang hrang paruk: Medicine, Surgery, Obstetrics and Gynaecology, Maternity and Paediatrics leh Dental te a awm a. Laboratory changtlung tak leh X-Ray khawl a awm nghal bawk a ni. Hospital ah hian 24 hrs Emergency Servic, OPD leh In Patient Department te a awm bawk a ni. Hospital hian khum 66 a nei a, chungte chu General Bed (30), Semi Cabin (4), Cabin Bed ( 12), ICU (5), NICU(8), Mother Bed (4) leh Emergency Bed (3) te a ni. 

Hawnna inkhawm hi Dr.K. Lalawmpuia, Paediatrician, LRM Hospital-in a kaihruai a. Technical Report Pu V. Lalduhawma, Director, LRM Hospital in a pe a. Pu Lalrinmawia (LRM) hnen atangin thusawi ngaihthlak a ni a. Dr. Pc Lalthlamuana, Medical Superintendent in lawmthu sawiin hun a khar a ni.