Vawiin khan Lungdai Primary Health Centre Buiding thar hawnna hun neih a ni a, Health & Family Welfare Minister Pu Lal Thanzara chu Khuallian niin Bialtu MLA Pu Hmingdailova Khiangte chu Khual zahawm a ni bawk.

Health Minister Pu Lal Thanzara chuan Lungdai PHC Building thar hawn ani ta hi a lawmawm a, a chhawrtu Lungdai leh a chhehvel khuate tan hmasawnna mellung pawimawh tak a nih ngei ka beisei, a ti a, Building thar hian thawktute pawh nasa zawk a phurna thar a pek ngei ka ring tlat a ni, a ti bawk. Pu Lal Thanzara chuan Lungdai khaw mipuite tanrualna chu fakawm a tih thu sawiin, Mizoram khawi khua mahin anla duan ngailoh Health Care, Lungdai khaw mipui damlo harsa zawk te tanpuina tur in duang chhuak te hi in entawn tlak hle a ni, a ti a, PHC Building thar sakna ah pawh neitu nihna thinlung nena in vil pui thin tih ka hriat hian hriselna kawngah Lungdai hian nasa takin hma a sawn ngei ka ring a ni, a ti bawk.

PHC Building thar hawnna ah hian Bialtu MLA Pu Hmingdailova Khiangte chuan Lungdai khawtlang hruaituten PHC buiding thar tha tak an neih theih nan a an rilru mai bakah hun leh tha tam tak seng a hma an lakpuina hi an entawn tlak hle a ni, a ti.

Pu Zothangsang Intoate, Sr EE, hnen atangin Technical report ngaihthlak a ni a, Village Council President Lungdai in thusawina hun hmangin Dr Lalhlimpuia, Chief Medical Officer, Kolasib in lawmthu sawina in hun a khar a ni.  

Primary Health Centre, Lungdai ah hian Out-patient, In-patient leh Office building a awm a, 277.58 Sq ft a zau a ni. IMR 2015-16 incentive hmangin January 2017 khan sak tan a ni a, Cheng Nuai 113 sengin July 2018 khan sak zawh a ni.