No.3530/2021-2022

Aizawl the 30th December, 2021 :

Vawiin khan H&FW Minister Dr R. Lalthangliana chuan Lunglei Civil Hospital building chhunga ruahman thar Covid damlo enkawlna Dedicated Covid Health Centre (DCHC) a hawng. He Centre hi December ni 20, 2021 ah khan luah tan niin a chhungah hian khum 28 awmin chungte chu DCHC khum 20, High Dependency Unit (HDU) khum pali leh ICU khum pali te an ni. Hawnna inkhawm-ah hian Lunglei HPC Vice Chairman Pu Lawmawma Tochhawng, Lunglei District official-te, Lunglei MJA-te, party hruaitute leh sawm bik dangte an tel a ni.

Vawiin hawnna program Pu R. Lalramnghaka, Secretary, H&FW Department kaihhruaiah Health & Family Welfare Minister Dr R. Lalthangliana chuan Covid-19 hrileng do kawngah sawrkar Department hrang hrang te, kohhran te, tlawmngai pawl te, khawtlang hruaitute leh Mizoram mipuite kan tanrual chhunzawm zela theihtawp kanla chhuah tlan zel a tula ni tiin Covid hri thar Omicron laka inveng turin Mizoram mipuite Covid Appropriate Behavior (CAB) ngai pawimawh chhunzawm zel turin a chah a ni. Mizorama Health infrastructure ti hmasawn turin sawrkarin theihtawp a chhuah mek zel thu leh Lunglei khawpui ngeiah pawh 'Laboratory Block’, ICU leh Trauma Centre-te ruahman mek anih thu a sawi. 

A Department dang chante hnuaia hmalakna pawh sawilangin Minister chuan H&TE Department hnuaiah MZU Southern Campus ti puitling tura hmalakna a kal zel thu leh sawrkar laipuiah DPR te thehluha umzui mek a nih thu a sawi a. MZU Southern Campus atan hian subject leh curriculum uluk taka thlan anih tur thu leh MZU Aizawla subject la awmlo te bultan tum a nih thu sawiin he campus hmunhma tur phal taka pe tur Pukpui VC leh khawtlang te chungah lawmthu a sawi a ni. C&I Department Minister chuan Bangladesh ram nena kan insumdawn tawnna atana ruahman Integrated Check Post (ICP), Kawrpuichhuah, Tlabung chungchang pawh sawiin border trade tih hlawhtlin ngei chu Department thiltum pawimawh berte zing ami a ni, a ti a. Kumin March thla khan Dhaka, Bangladesh ah zinin Bangladesh Commerce Minister Tipu Munshi leh  Bangladesh Commerce Ministry-a official pawimawh ten en hemi chungchang hi chipchiar taka an sawiho thu leh Bangladesh lam pawh an inhawn thu a sawi a. He hmalakna ti hlawhtling tur hian kum tharah Kawrpuichhuah tlawh leh thuai a tum thu a sawi a ni.

Health Minister hian vawiin vek khan BCCC leh Christian Hospital Serkawn hman atan cheng 30,000 a hlan a. Hemi bakah hian Civil Hospital Lunglei, John Williams Hospital, Hnahthial District Hospital, Hope Hospital, Faith Hospital, Haulawng PHC, Tawipui PHC leh Lungsen PHC-te hnenah kumthar chibai bukna sum fai a hlan bawk a ni.