2268/2025-2026

Dated Aizawl, the 18th November, 2025: Vawiin khan Pi Lalrinpuii, Minister, Health & Family Welfare Department chuan Mamit District-a hman tur Mobile Medical UNIT VAN (MMUV) chu a office chamber, MINECO atangin a vai liam.

Health Minister chuan Mamit aspirational district-a hman tur MMUV tha tak TATA AIG leh SWASTI-te zara neih a ni chu lawmawm a tih thu sawiin Mission Foundation Movement (MFM) hmalakna avanga sawrkarin CSR hrang hrang an dawng thin chu lawmawm a tih thu a sawi bawk a. He project hian sawrkar, private company leh CSO-te an thawhho chuan rah tha a chhuah thin tih a lantir, a ti a. MMUV hmang hian thingtlang kilkhawr leh damdawiin pan harsatna hmunahte awlsam zawkin mipuite an in entir thei dawn a ni a ti a. He project-ah hian regular health camp telin, hei hian natna awm thei ven kawngah te, counselling leh damdawiin lian zawka a hun taka in refer nan te a tangkai tur thu a sawi a. Mipuiten hriselna kawnga sawrkar scheme hrang hrang an hmelhriata, mi tam zawkin hamthatna an dawn theih chu he project thil tum a nih thu a sawi bawk a ni.

He hun hi Pu Lalengmawia, Commissioner & Secretary, Health & Family Welfare Dept. chuan kaihruaiin TATA AIG leh SWASTI-te chu Mizoram sawrkar nen thil hrang hranga thawkho zel turin a sawm a. Pu Lalramchuanzela, MFM Executive Director chuan Mamit khaw hrang hrangah damlote tan inentirna leh inenkawlna tur awm lohna a la tam thu sawiin, MMUV chu thingtlang kilkhawr tak taka awm te tan a hlu hle dawn tih a sawi a.

Vawiin hunah hian TATA AIG atangin Pu Devang Pandya, Vice President & Lead, CSR & Sustainability leh Pu Madhukar Sinha, President, Government & Rural Business-te telin, an company hmalakna hrang hrang te an sawi a. SWASTI atangin Pu Joseph Julian K.G., Senior Director chuan thu a sawi bawk a. Dr. Lily Chhakchhuak, Mission Director, NHM chuan lawmthu sawiin hun a khar a ni.

Mobile Medical Unit Van hi TATA AIG General Insurance Company Ltd leh Swasti - The Health Catalyst-te CSR atanga fund a ni a. Tata Yodha Pick up hi Rs. 12 lakhs man niin damlo enna khawl X-ray leh test chi hrang hrang enna bungrua Rs. 26 lakhs chuang hmanga thuam a ni a. MFM chu implementing agency niin, NHM nen tangkawpin Mobile clinic hi neih thin a ni ang. MMUV hi Mamit District-a Doctor leh damdawiin awm remchan lohna khaw hrang hrang a tlan kual tur niin, Doctor, Nurse leh Medical staff te nen heng khaw hrang hrang te hi an fang kual thin dawn a ni.