2266/2025-2026

Aizawl dated 18th November 2025: Press Information Bureau bultuma ‘One Day Media Conclave – Vartalap’, I&PR Auditorium-a buatsaih chu Pu B.Lalchhanzova, Minister, Information, Public Relations & Printing & Stationery Department chuan Khuallian niin a hmanpui a. Pu HK Lalhawngliana, Commissioner of State Tax chu khual zahawm niin Pu Nampibou Marinmai, IIS, Director (News), Doordarshan Kendra, Aizawl chuan kalkhawmte lawmna thu a sawi a. Mizoram Journalist Association, ICFAI University leh Mizoram University zirlaite he hunah hian an tel a ni.

Minister Pu B.Lalchhanzova chuan India ram inpumkhatna tinghettu, ram hmangaihna kai harh theitu, Shri Bankim Chandra Chatterjee hla phuah, National Song ‘Vande Mataram’ kum 150 tlin lawmna puala Press Information Bureau hmalakna a ‘One Day Media Conclave – Vartalap’ buatsaih a ni chu lawmawm a tih thu a sawi a. He ni puala thupui pawimawh tak tak hmanga mithiamte kaltlanga zirtirna neih a ni chu hlawhthlak a tih thu a sawi.

I&PR Minister chuan ‘One Day Media Conclave’ a zir tur thupui zingah ‘GST Reforms 2025: Relief for Common Man, Boost for Business’ chu Mizoram tana zir tur thupui pawimawh tak a nih thu a sawi a. Ram tih hmasawn nan leh ram leilung fate thinlungah neitu nihna thinlung, ram hmangaihna rilru kan put tlan theih nan ‘Tax’ hi hmanraw tangkai tak a nih thu a sawi. Pu B.Lalchhanzova chuan ‘Chhiah’ hmanga ram siamthat hna kalpui a nih theih nan Land Revenue & Settlement Department-ah pawh chhiah lak dan kalphung thlak danglam a nih thu a sawi a. Sawrkar laipui rinchhan ngai lutuk lova inrelbawlna kan kalpui theih nan kawng hrang hranga chhiah pek ngaite kan ngaih pawimawh a tul thu a sawi.

One Day Media Conclave hmanna huna Tribal chenna khua tih hmasawnna tura Sawrkar laipuiin a tlangzarh tak,‘Adi Karmayogi Abhiyan’ zirchianna hun tha buatsaih a ni chu Khuallian chuan lawmawm a tih thu a sawi a. Thingtlang khaw hrang hrang tih hmasawn nan hian Sawrkar hnuaia Department-te thawhho thiam a pawimawh thu tarlangin, mahni inrelbawl thei tur khawpa thiamna, theihna leh hriatna tangkai tak tak, thingtlang khaw hrang hrangah pek a tul thu a sawi a. Thingtlang khuaa chengte chu ram hmasawn nana thawktu pawimawh berte zing ami leh hmasawnna tehfung pawimawh tak annih thu a sawi bawk a ni.

Khual zahawm Pu HK Lalhawngliana, Commissioner of State Tax chuan ‘GST Reforms 2025’ zirhona hun buatsaih a ni chu lawmawm a tih thu sawiin Mizoramah chak lehzuala chhiah khawn hna kalpui mek a nih thu leh, dik tak leh a hun taka chhiah lakkhawm a nih theih nan ‘Quick Response Team’ pawh din a nih thu a sawi. September 2025 atanga hman tan, GST 2.0 kalpui a nih hnuin Mizorama Tax lakkhawm a than zel thu, Commissioner of State Tax chuan a tarlang a. Mipui hnen ah, a hun tak leh dik taka Tax pek pawimawhna hrilhhriat kawnga thawhpui ah, Media Conclave chhimtute zawng zawng chu a sawm bawk a ni.

One Day Media Conclave - Vartalap Technical Session-ah hian Prof. (Dr.) Ayangbam Shyamkishor, Department of Political Science, MZU chuan ‘Commemoration of 150 years of Vande Mataram’ tih thupui hmangin zirtirna a pe a. Prof.(Dr.) James LT Thanga, Department of Economics, MZU chuan ‘GST Reforms 2025: Relief for Common Man, Boost for Business’ tih thupui hmangin zirtirna a pe a, ‘Adi Karmayogi Abhiyan: Empowering Individuals & Institutions for Tribal Transformation’ tih thupui hmangin Pi Biakthansangi Hrahsel, Deputy Secretary, Planning & Programme Implementation Department chuan zirtirna a pe bawk a ni.