No.1686/2021-2022

Mamit 4th August, 2021 : Nimin khan Dr. R. Lalthangliana, Health Minister chuan Mamit District Hospital khum 100 awmna tur sak mek chu a tlawh a, Dr. Lalrozama, IAS, DC Mamit leh Pu Shashank Jaiswal, SP, Mamit, District Medical Superintendent-te chuan lo dawngsawngin hna kal mek leh hmachhawp awmte an enpui.

Health Minister chuan Mamit District Hospital khum 100 lai awm theihna tur sak tan a ni chu hmasawnna lawmawm tak a nih thu a sawi a, tluang taka hna kalpui a nih theih nan a satu Zamzo Engineering Construction & Consultancy te chu ram leh hnam tana rotling tak din tur an nih avangin tha taka Hospital sak hna chu thawk tur leh a sak hun chhung tura ruahman lawk thla 24 chhunga sa zo ngei thei tura hnathawk turin a chah a. District Hospital Mamit-a thawktute pawh tha taka hna vil turin a chah bawk. 

District Hospital Mamit hi khum 100 awmna tura ruahman niin Building hi Rs. 17.93 crore senga sak tur a ni a. Power Finance Corporation Ltd. CSR atangin 17.93 Crore, PFC atangin 70% (12.55) Crore ruahman a ni a. A bak senso zawng chu State Government-in a tum ve thung dawn a ni. Building sak hna thawktute hi Zamzo Engineering, Construction & Consultancy te an ni.

Minister hian nizan khan DC Bangla-ah District Level Task Force on Covid -19 Mamit District-te hrileng mek chungchang sawihona a neihpui bawk.