No.1685/2021-2022

Aizawl 4th August 2021: Nimin khan Mizoram Legislative Assembly Speaker Pu Lalrinliana Sailo, Chalfilh bialtu MLA chuan a bial chhung Khawruhlian leh Hmunnghak a tlawh a. Tun hnaia ruahsur nasa avanga hmun hrang hranga lei min leh lei tawlh te a hmunah a en a ni.

Khawruhlian khaw hnuaiah hian NH 150 cheithat leh tihzauhna turin kum 2018 atang khan kawngpui laih tan a ni a.  Hei hian Khawruhlian khaw innghahna lei lung a khawih che viau niin a lang a. Lei min leh lei tla hniam hmun hrang hrangah a siam zui ta a. Furpui thlen hun apiangin harsatna an tawk kum tin ta a ni. Nimin khawvar hmaa ruah sur khan leimin hmun hrang hrangah a siam a. Khawruhlian thlen hma hmun thenkhatah nasa takin lei a min a, chungte chu lirthei paltlang theih tura tihfai nghal a ni a. Khawruhlian leh Hmunnghak inkara leimin erawh thenfai rual lohvin a nasa a, kawngpui hi a pumpui deuhthaw a bal a ni.

NH 150 kawng thar laih mek hi peihfel a la nih loh bakah hmun hrang hrangah leiminin a hnawh nasa a. Khawruhlian leh Hmunnghak inkalpawhna kawngpui, kawng hlui zawk a chim tak avang hian hmar lam khaw 30 chuang zet chu kal pawh theih a ni ta lo a ni. He kawngpui hi Mizoram atanga Manipur kal pawhna kawng pakhatah hman thin a ni a. Ruahmanna ang chuan tuna kawng thar laih mek siam zawh a nih hunah chuan Act East Policy hnuaiah Kaladan Multi-Modal Transit Transport Project-a kawngpui sial mek hi a pawh dawn a ni.

Khawruhlian khaw hnuaia NH 150 laih mek zuk pawh tur hian Khawruhlian khaw hmun laili lai tak atangin kawng thar (diversion) laih tumin ruahmanna siam a ni bawk a. Hemi atana PWD leh khaw mipuiten hma an lak dan leh harsatna an tawh mek dan te bialtu MLA Pu Lalrinliana Sailo hnenah  hian an thlen a ni.

Speaker Pu Lalrinliana Sailo hi PWD CE Highway Pu Lalruatkima, PWD SE Pu C.Lalchhuana, Adl. DC Aizawl Pu R.Vanrengpuia leh official dang ten an tawiawm a ni.