Kum hnih dana neih thin Mizoram Govt. Nursing Service Association General Conference vawi 17-na chu nimin khan Synod Conference Centre, Mission Vengah tan niin vawiinah hian Silver Jubilee lawmna puala hun hman a ni a, Health Minister Pu Lalrinliana Sailo chuan a hmanpui a ni.
Health Minister chuan tunlai khawvel, thiamna sang tawh takah Health Department pawhin hma a sawn chho zel tih sawiin hriselna lama hma kan sawn theihna tur chuan Doctor leh Nurse thiamna sang tak tak nei te hman tangkai theih tur khawl leh hmanraw tha kan mamawh a, chumi tur chuan nasa takin tan kan la a ni, a ti. Mizoram College of Nursing Building tur Falkawna sak mek pawh chak tak leh tha taka hna kalpui a nih theih nan Minister chuan amah ngeiin a hmunah vawi tam tak a tlawh tawh thu leh a vil reng tur thu sawiin zirna in tha leh changkanga zirchhuak te hian mahni inrintawkna leh thiamna ziktluak an paw chhuak nge nge a ni, a ti bawk. Pu Lalrinliana Sailo chuan tunhnai lawka Nurse 38 regular lakna tur written exam neih chungchangah mipui ti chi ai thei thu thangva diklo awm a lo hriat thu sawiin hemi chungchangah hian fimkhur tak leh belhchian dawl takin thil kalpui a ni a, diklo a lo awm a nih chuan sut leh vek pawh an inhuam thu a tarlang a. Inthlan a hnai emaw a hla emaw, hlemhletna do kawngah tha an thlah dawn lo tiin Minister chuan sorkar hna thawkte zingah politics a lo inhnamhnawih an awm anih chuan dim an ni dawn lo, a ti bawk.
Health Minister hian ram pum huap Nurse chawimawina sang National Award, tunhnaia National Florence Nightingale Award tia a hming an thlak tak dawng tawh Nurse pariat te hnenah chawimawina thuziak a hlan a. Chung te chu -Pi Challiani Ralte, a ni 1974 ah dawngin Indopui Pahnihna a sipai hliam te theihtawp chhuaha a enkawl vangin he chawimawina hi a dawng a, hmarchhak Nurse te zinga he chawimawina dawng hmasa ber a n nghe nghe; Pi Lalbiakveli (L) hian 1974 ah a dawng a, Pi V. Zochami’n 1979-ah; Pi K. Lianchhingi leh Pi C. Romawii’n 2008-ah an dawng a; Pi K. Thansiami leh Pi Kapzawni te hian 2009-ah dawngin tuna Joint Director Nursing ni mek Pi Lalbiaksangi hian kum 2011 he chawimawina hi a lo dawng tawh bawk a ni.
Vawiin inkhawmah hian an member Service laia boral ta mi panga te sunna hun an hman bakah Pension-a chhuak ta mi 12 te hnenah ngaihhruina thilpek an hlan a. MGNSA President Pu H.S. Lalremtluanga’n an pawl hmalak tawhna te leh hmachhawp te a tarlang a, an General Secretary Pi C. Zopari’n an pawl kum khat kalta report a pe a. Silver Jubilee puala Souvenir buatsaih chu khuallian Health Minister Pu Lalrinliana Sailo chuan a tlangzarh nghal bawk a ni.
