Directorate of Agriculture(Research and Education) buatsaihin vawiin khan KVK(Krishi Vigyan Kendra) Scientific Meeting vawi 2-na chu Agiruclture Conference Hall-ah neih a ni a. Agriculture Minister Pu H. Liansailova chu Khuallian a ni.
He meeting ah hian district hrang hrang a KVK 8 enkawltu mithiam rual ten agriculture leh a kaihhnawih eizawnna peng hrang hrang hmasawn nana an hma lak te leh, science thiamna hmanga an thil hmuh chhuah te an entir a. Hun enge maw chen enchhinna an lo kalpui tawh atanga buh leh thlai dang hlawk zawka chin dan an hmuh chhuah te chu Mizoram puma loneituten an chhawr tangkai theih tura puan chhuah leh hmalak zel dan tur te sawiho a ni.
Khuallian Pu H.Liansailova chuan ei leh bar hi mihring mamawh hmasa ber a nih avangin agriculture leh a zawmpui hna peng dangte chu ram hnuk pui ber a ni, a ti a. Hei vang hian Mizoram sorkar chuan ei leh bara thlaphang hauh lova awm theihna tur hi a ngai pawimawh hmasa ber a. Chumi hawi chuan leilung beh chhan eizawnna nghet nei turin NLUP chu sorkar-in a programme pawimawh ber ah a nei a ni, a ti a. Ei leh bara intodelhna piah lamah sum leh paia ram din hmun chawikan nan agriculture a sumdawnna, agri-business chu sorkar hmathlir pawimawh dang leh chu a ni, a ti bawk.
Pu Liansailova chuan KVK a mithiam ten anmahni district huam chhung theuhva enchhinna an lo kalpui te, an thil hmuh chhuah leh hlawhtlinna te chu sorkar flagship programme hlawhtlin nan a pawimawh tak meuh tih sawiin hetianga a taka research leh experiment kalpui hi Mizoram mamawh a ni, a ti a. An thiamna leh an thil hmuh chhuah te chu Zoram puma loneitu te hman theiha chhawp chhuah theih hlan a nghahlelh awm tih sawiin loneitute an kaihhruaina ah quality pawimawh zia uar taka thehdarh turin a chah a. Agriculture a hmasawnna chuan Mizoram ah industry dang tam tak a cho chhuak dawn a ni, a ti.
District 8-a KVK te hi Selesih KVK tiam lovin Directorate of Agriculture(Research and Education) hnuaiah an awm a. Selesih KVK hi Central Agricultural University hnuaiah a awm thung a. Directorate of Agriculture(Research and Education) hian scientist ten agriculture leh a zawmpui hna peng hrang hranga thil tha an hmuh chhuah te, Mizoram leilung leh sik leh sa nen a inmil ve em tih zirchianna an neih nawn leh hnu ah a tha ngei tih finfiah te chu kut hnathawktute hnenah hlan chhawngin a tul angin an buaipui zui thin a. Research kal tlangin heng thlai leh thil dangte hi Mizoramah an tha tih finfiah tawh a ni:
Buh - Aizawng, Piolee, Tamphophou, Sampada, RCM-10; Strawberry - Sweet Charlie; Bawkbawn - RCMBL - 3, 2 etc; Vaimim - HQPM; Alu - Kufri Megha; Ar - Giriraja, Vanaraja, Keystone; Purunsen - Matahari; Thei - Kiwi Bahla - Zing taka phun (high density planting)etc; Thlai vawn thatna - Zero energy cool chamber etc.
Vawiina scientific meeting hi Pu T.V.Fambawl, Secretary, Agriculture department-in a kaihruai a. Pu C.Lalniliana, Director of Agriculture(Reasearch and Education) chuan keynote address a pe bawk a ni.
