Vawiin khan Chief Minister Office’s Cabinet Room-ah Chief Minister Pu Lal Thanhawla kaihhruaina-in Skill Development Mission an thukhawm.

Skill Development Mission hi thalaite hmakhua thlirna, eizawnna tlak thiamna chherchhuah sak hi a tum lian ber pakhat niin, 12th Five Year Plana a kalpui dan tur an sawiho a. National Policy zulzuiin a thil hlenchhuah tumte, a kalhmang turte, sum hnar tur leh inkaihhruaina tur dan zam fel chungchangte sawiho a ni a. Eizawn nana hmantlak thiamna chherchhuah na tur kalpui hi hma a sawn dan ang zela a khat tawka thlirletna neih thin tur a ni a. Tulah phei chuan private leh public lam atanga thurawn tha te pawh dawn theih a ni ang.

Sawihona ah hian Chief Secretary kaihhruaina hnuaiah State Skill Development Board din nise tiin, central sorkarin kum 2022 a thalai maktaduai 500 chuang te hnena eizawnna tlak thiamna chherchhuah dan tur a duan zulzuia kalpui tur a ni.

National Skill Development Mission hi Prime Minister kaihhruaina hnuaia din a ni a. Hemi zulzui hian State tinah Skill Development Mission hi din ve a ni.

Mission thutkhawmnaah hian Labour & Employment Minister Pu Lalrinliana Sailo, Education Minister Pu Lalsawta, Social Welfare Minister of State Pu P.C.Lalthanliana, Chief Secretary Pu Van Hela Pachuau leh sorkar official pawimawh tak takte bakah department hrang hrang hotute an tel a ni.