Vawiin chawhma khan Mizoram Institute of Medical Education & Research, Falkawn ah New Academic Block, Director’s Quarter leh Ladies & Gents Hostel thar sakna tur Lung Phumna hun hman a ni a, Health & Family Welfare Minister Pu Lal Thanzara chu Khuallian niin Dr L.Fimate, Director MIMER, Dr Lalhmuchhuaka, Medical Superintendent State Referral Hospital, Falkawn leh MIMER hnathawkte leh zirlai naupangten he hun hi an hmanpui.

Health & Family Welfare Minister Pu Lal Thanzara chuan Medical College hmasawnna turin a ruangam pawimawh tak tak sak belh zel a ni a, vawiina lung kan phum chhan building thar Pali sakna tur pawh hi hmasawnna tur atana pawimawh tak a ni, a ti. Pu Lal Thanzara chuan Medical College hi Sawrkar ta ni mahse a chhawrtu leh neitu chu mipui hi kan ni, a ti a, Kan hmabak kan kalkawng zawh tur hi a la thui hle a, endiktute duhdan leh tih tur min tukte hi kan puitlin zel a la ngai dawn a “Medical College kan din tawh,” tiin tha kan thlah mai tur ani lova, chawl lovin hna kan la thawh zel a ngai dawn a ni, a ti bawk. Health Minister chuan, heng building te hi Zirna kawngah Mizoram hmel lanna tur pawimawh tak a ni dawn a, chuvangin a satu te hian in uluk hle tur a ni, a ti a, contractor te chu tha thei ang bera hna thawk turin leh Department in an hnathawhte an vilpui reng tur thu a sawi bawk.

Dr L Fimate, MIMER Director chuan Medical College tih changtlun anih theih nana Sawrkar thahnemngaihna leh hmalaknaah lawmthu a sawi a, MIMER a MBBS zirlai kalpui dan tlangpuite sawifiahin Building thar Pali sak dan tur Technical report a pe nghal bawk.

MIMER a New Academic block hi M/S MP Khaitan ten Hospital Services Consultancy Cooperation (HSCC) hnuaiah an sa meka, department pasarih awmna tur niin chhawng ruka sang tur a ni a kum 2 chhunga sak zawh tura ruahman a ni bawk. Director Quarter hi TBL Architectural Consultant in an sa anga Ladies and Gents Hostel hi Zothantluanga Consultancy Service ten an sa bawk ang, Director quarter hi kum khat chhunga sak zawh tura ruahman niin Hostel Pahnihte hi kum 2 chhunga sak zawh tura ruahman a ni.

Attachment

  • Loading attachment...