No.810/2020-2021

Health & Family Welfare Minister Dr. R. Lalthangliana chuan vawiin khan a pisa-ah Kolkata a mizo zinga COVID-19 natna kai, cancer vanga inenkawl mek nizana boral a awm thu sawiin hmun hrang hranga COVID-19 natna vei mizote dinhmun a sawifiah.

Health Minister chuan Kolkata AMRI Hospital-a mizo cancer vei inenkawl mek zinga pathumin tunhnai khan COVID-19 an vei tih hmuhchhuah a ni a, COVID-19 natna kai thar zinga pahnih hi mipa niin an zinga pakhat zawk Vairengte khua ami chu vanduaithlak takin nizan khan a boral a ni a ti a, cancer natna a neih sa avangin COVID-19 do zo tur hian a taksa in tlin loh chin a nei hi pawi a tih takzet thu sawiin Health Minister chuan amah bakah COVID-19 vei dangte theihtawp chhuah a kan tawngtaipui bakah enkawlna tha an dawn theih nan hma kan lak mek laia mizo fate zingah ani kan chan ta hian ka thinlung a khawih takzet a ni a ti a.

Health Minister chuan COVID-19 natna avanga boral ta chu sawrkar laipuiin inkaihhruaina dan a siam zawm a ngaih avangin Mizoramah rawn haw pui theih a ni lova, hetih lai hian Vairengte-a a chenna inah amah thlahna hun vawiin khan siam niin anmahni bialtu MLA Pu Lalrinsanga Ralte pawhin he hun hi a hmanpui a ni a ti a. A ruang hi mizo in vui dana thlah liam a nih theih nan kawng hrang hrangin hma lak a ni a, tunlai boruak avangin kan beisei leh duh anga thil a kal vek theilo erawh chu pawi ka ti hle a ni, a ti a. Khulam sawrkar thuneitute remruatna leh ruahmanna kan zawm a ngai a, zanin hian a ruang hi vuiliam tura ruahmanna siam a ni, a ti.

Kolkata a COVID-19 vei damlote chu cancer natna vei mekte an nih avangin a bik taka COVID-19 veite an dahhranna Hospitala dah an nih bakah, cancer enkawlna tul leh mamawhte lo buaipui turin West Bengal-a Minister of State for Health Pi Chandrima Bhattacharya leh Dr. Nath Ari te vawi duailo a biak thu sawiin, anni pawhin hma an la a, Cancer lam mithiam bik an neih Dr. Rajendra Pandey, Oncologist chu mizo cancer-te dinhmun enpui tur hian an ruat nghal a ni a ti a. COVID-19 damlote bakah hian damlo enkawltu (attendant) te leh Mizoram house-a COVID-19 hri kai hlauhthawnawma ngaih mi 23 tunah hian quarantine mek an nih thu sawiin, Health Minister chuan dinhmun harsa tak kan tawh laia Kolkata Mizoram House Joint Resident Commissioner Pu Jacob Lalawmpuia leh a thawhpuite bakah, Kolkata Mizo Welfare Association hruaitute leh memberte inpekna a chhuanawm a tih thu a sawi a ni.

Mumbai Mizoram House-a COVID-19 positive pariat hmuhchhuah zingah pahnih positive an la awm thu sawiin, mizo cancer vei inenkawl mek pakhat leh hnam dang Mizoram House a thawkte an ni a ti a. Tunah hian an zinga pali chu dam fel tawh a puan niin a dang pahnih pawh hi test negative tawh sa an ni a, a tihchian nan test leh niin result nghah mek a ni a ti.

Zoram Medical College a COVID-19 positive kan neih mek pawh a dinhmun a that chhoh zel thu sawiin a negative a ni tihchianna turin nili chhung a zawna sample test tur an lak pawh Silchar Medical College ah thawn a ni a ti a, reiloteah result hriat a beisei thu a sawi.

Shillonga COVID-19 vanga boral ta Dr. John Sailo chenpui a chhungte zinga COVID-19 natna vei te pawh an negative vek tawh tih sawiin test ngai tawh lo ang a ngaih an ni, a ti bawk.