No.2198/2021-2022

Aizawl, 13th September, 2021 : Health & Family Welfare Minister Dr. R.Lalthangliana chuan vawiin khan a pisaah Mizo kutchhuak Zopharm Hand Sanitizer leh Disinfectant a tlangzarh.

Health Minister chuan COVID-19 hripuin lengin Mizoram min nuai nasat lai taka Zopharm ten anmahni kutchhuak liau liau mipuite hman theih tura an rawn chhawpchhuak chu a lawmawm takzet tih sawiin, Pathianin finna leh remhriatna a pek hmang tangkaia, sawrkar hna hmuhna atan ringawt hman tum lova, an thiamnate a nihna tur ang taka hmanga, mahni ke a dinchhuahpui an tum chu entawntlak a tih thu leh midangte chochhuaktu nise a duh thu a sawi a, kawng hrang hranga talent nei tha tak tak Mizo thalaiten an thiamna zawn theuhah theihtawp an chhuah chuan an hlawhtling thei a ni tih tarlangtu ni turin duhsakna a hlan a ni.

Minister chuan Mizoram hian thil siamchhuah kan nei tam lova, lohtheihlohna avangin state dangah kan sum leh pai a luangchhuak nasa em em tih tuman kan hai lova. Mizo siamchhuah ngei, damdawi siam lama thiamna neite siam, rintlak leh man to chuang si lo, mitinin kan mamawh em em bawk si, lo leisak hi Mizoram hmasawn nana kan lo tih ve theih a ni tih i hre thar theuh ang u, tiin mipuite a chah bawk a ni.

ZoPharm hi Mizoram-a Hand Sanitizer leh Disinfectant siam phalna, Manufacturing License, Food and Drug Administration (FDA), Govt of Mizoram-in Drug and Cosmetic Act, 1940 hnuaia a pek hmasak ber a ni a. Tunah hian WHO Formula-1 Hand Sanitizer size hrang hrang, 50 ml, 500 ml, 1 litre leh 5 litre te an siam chhuah bakah Disinfectant chi hnih, Sodium Hypochlorite USP (5 % w/v) leh Hydrogen Peroxide (5 % w/v), 5 litre leh 1 litre-a pack ve ve an nei tel bawk a. Hand sanitizer pawh WHO duhdan ang thlapin 80% alcohol an hmang a ni.

Zopharm product te hi vairam atanga lo kal ho nen an man a inang reng a, chutihrualin vairam atanga product lo kal ho tamtak aia rintlak tura ngaih an ni. An product siamna atana chakkhai (raw materials) laknaah an duhtuiin certificate of analysis pe thei lo chu an dawr lova. Raw materials ho hi anmahniin an lo test leh thlap bakah an thil siamchhuah, product te pawhin test an paltlang leh thin. Hand Sanitizer leh Disinfectant bakah hian product hrang hrang la neih belh zel an tum bawk ani.

Managing Director Pi Lalrinsangi Sailo, M Pharm (Biotechnology) chuan ZoPharm chu July, 2021, Covid-19 hrilengin khawvel pumpui a tihbuai laia, hrileng lo doletna hmanrua pawimawh tak tak, hand sanitizer leh disinfectant lo siamchhuak ve tura din a nih thu a sawi a. Food and Drug Administration lamin Mizorama hand sanitizer tha lo an han hmuhchhuah tak nualah chuan, hand sanitizer rintlak, man man taka Mizo mipuite lei theih tura phochhuah hi ZoPharm tum ber a ni tih a sawi a ni.

ZopPharm dintute hi Mizo hmeichhe pharmacist rual niin, Pi Lalrinsangi Sailo, M Pharm (Biotechnology) chu Managing Director a ni a. Technical Consultant hi NI. PC Lalawmpuii, MS Pharm, PhD a ni. Consultant dangte hi Pi R. Lalawmpuii, MS Pharm, PhD leh Pi K. Thanzami, MS Pharm PhD te an ni bawk.

Vawiina Zopharm products tlangzarhnaah hian Health Secretary Pu R.Lalramnghaka leh Pu Lalsawma Pachuau, Jt. Director, Controlling & Licensing Authority, Food & Drug Administrator te an tel a ni.