2145/2024-2025

Aizawl 20th September, 2024 : Vawiin khan Mizoram College of Nursing, 37th Graduation and Lamp Lighting Ceremony 2024, Multipurpose Hall-a hman chu Pi Lalrinpuii, Hon'ble Minister, Health & Family Welfare Department chuan khuallian niin a hmanpui a. Pu TBC Lalvenchhunga, MLA & Adviser to CM (Finance & Planning) chu khualzahawm a ni. 

Khuallian Health Minister chuan MCON Graduation and Lighting Ceremony Vawi 37-na hmang tura sawm a ni chu lawmawm a tih thu sawiin Graduate thar mi 30 te leh Top 10 a mi 4 lang te chu a lawmpui thu sawiin kan state tan leh kan ram tana mi tangkai tak an la nih ngei a beisei thu a sawi a. Tuna 1st Year zirlai, Nightingale pledge hmanga thutiamna neite pawh Nurse tha tak ni tura an zirlai te tha taka zir turin a chah bawk. 

Nurse hna chu hna zahawm leh hna tha tak a nih thu sawiin Sawrkar pawn a ngaipawimawh a, hmani lawka India rama Nurse hnathawk tha chawimawina - Florence Nightingale Award kan Mizo Nurse Pi H. Mankimi'n India President hnen atanga a dawng thei kha thil hlu leh ropui tak a ni a ti.

Tunlaiah Social media a chak tawh a, Nurse vin, Nurse sual chungchang hmuh tur a awm leh thin chu a pawi a tih thu sawiin intawngkam khat lek pawhin dam lo te a tidam sawng sawng thei a, midangte tanpui thei tura zirchhuak an nih inhrereng turin a chah a. Tunlai mila inher rem thiam tur leh hmasawn tumna rilru nei a, ruihhlo leh HIV/AIDS chungchangah midangte zirtirtu, midangte entawntlak ni turin a chah a. Zirlai graduate tharte chu Mizoram pawna hnathawh hreh lo tur leh foreign thleng pawha hlawh tha tak an hlawh theih tur thu sawiin Mizoram nurse te an hnathawh phu lova an hlawh a tlem chu a veiawm tiin an harsatna sutkianpui turin theihtawp a chhuah reng thu a sawi bawk.

Minister chuan Mizoram Health System Strengthening Project hnuaiah World Bank Funding-in MCON thuamthat hna thawh mek a ni a. Building sakna atan cheng Vaibelchhe 5.73 leh hmanrua leh furniture tul lei nan Vaibelchhe thum sanction niin hna hi August 2023 atanga thawh tan tawh a ni a. M.Sc Nursing (25 seats/year) leh Post Basic B.Sc Nursing (30 seats/year) zirna 2025 July thla atanga tan tura hmalakna neih mek a nih thu sawiin Ministry hnuaiah Mizoram chhunga Nurse te tan training paruk pekna tur dilna siam niin phalna pek tawh a ni a. Cheng Nuai 13.71 vel tura ruahman a nih thu a sawi. Nurse zir chhuakte chu an kalzelna turah duhsakna hlanin zirlai lut tharte pawh hlawhtling ngei tura theihtawp chhuah turin a chah bawk a ni. 

Pu TBC Lalvenchhunga, he hun khualzahawm ni-a hmanpuitu chuan zirlai graduate tharte fuihna thu sawiin an hnathawhna hmunah harsatna hrang hrang occupational harzards leh rilru lam thlengin mental harzards an tawh hun te a awm theih thu a sawi a. Chung hunah chuan chhel taka awm a, kohna an dawn ang ngeia damlote tidamtu, chhawmdawltu leh fuihtu ni zel turin a chah a. Naktuk atang chuan an zirtirtute tel lovin midang entawn tur leh midangte zirtirtu an nih a ngai tawh dawn a, an thawhna a piangah Mizo taka tlawmngaih chhuah a, Mizo tlawmngaihna chu an hnathawhna hmunah lantir zel turin a chah a ni.

Pi Lalduhsaki, Principal, MCON report tarlan danin MCON hi GNM (General Nursing and Midwifery)-in Kum 1980 khan din niin Kum 2005-ah B.Sc Nursing chu zir tan theiha buatsaih a ni a. Tunah hian Nurse zirlai 131 awm mekin an vai hian hosteller an ni vek a ni a. Teaching faculty 22 awm mekin non teaching staff 30 vel an awm bawk a. Graduate thar te hi batch 16-na niin an vaiin 30, hmeichhia 28 leh mipa 2 an ni. Vawiina B.Sc Nursing zirchhuakte hian TATA Medical Center Kolkata, Appolo Hospital Delhi, Max Hospital Delhi leh Yashoda Group of Hospital Hyderabad- ah te placement Job hmu sa 17 an awm a ni.

Pi Lalchhanhimi, Jt. Director (Nursing), Directorate of Nursing kaihhruaiin Nursing zir thar tur 19th leh 20th batch atangin thutiam neiin Lamp Lighting neihna hun an hmang bawk a ni.

He hunah hian Zirlai titha hnenah hian L. Chhawnkima (L) chawimawina pek an ni a. A tunu Meicy Lallawmzuali hnen atangin thusawi ngaihthlak a ni a, Zirlai graduate thar aiawh leh nu leh pa aiawh atangin thusawi ngaihthlak a ni bawk a ni.