Vawiin khan Mizoram Health Multi Purpose Service Association General Assembly vawi 35-na chu Chanmari YMA Hall, Aizawl-ah hman a ni a; Health Minister Pu Lal Thanzara chu Khuallian niin khawmpui hawnna hun a hmanpui.
MHMSA General Assembly hawnna inkhawm MHMSA President Pu P.Manliana kaihhruaiah Khuallian Pu Lal Thanzara chuan mipuite hriselna kaihhnawih sorkar programme hrang hrangte hlawhtling taka kenkawh leh kalpui, mipuite hnena thlentu leh hrilhtute chu anmahni ngheng renga awmchilhtu Community Health Officer, Health Supervisor leh Health Worker-te an ni, a ti. Khawtlang hrisel leh hrisel lo atangin hna an thawh that leh that loh a lang tiin Health Minister chuan mimal, chhungkua leh khawtlanga mamawhtute pan leh koh theih mai tura awm turin leh an bial chhunga damlo harsatna neite zawnchhuah chu an tih tur pawimawh tak a ni, a ti. Mipuite hriselna chu sorkar ngaih pawimawh ber pakhat a nih avangin kuminah pawh Health Worker mi 185 lak thar an nih thu sawiin hengte hi indaihlohna hmun leh thingtlang kilkhawr zawk, a mamawh ngawih ngawihtu tamna, Health Worker la awm lohna khuaah-te post an ni dawn a, tidamtu an ni tih hre reng chunga missionary rilru pua hna thawk turin a fuih. Lawngtlai District khawthlang lamah Sub-Centre thar 7 hawn phalna hmuh a ni tawh a, heng khuaahte chuan tuna Health Worker lak thar engemawzat chu dah an ni dawn tih a sawi bawk.
Health Minister chuan thu a sawi zelnaah India Today-in state hrang hrangte hmasawnna an tehna State of the States Report-ah nikum khan Mizoram chuan Health Sector-ah ‘Most Improved Small State’ lawmman a dawng a, kuminah erawh chuan state dangin he dinhun hi an chang a; he dinhmun hi kum tharah chan leh ngei theih nan Health Department hnuaia thawk zawng zawngte chu inpekna thar nen thawk turin a chah. MHMSA hotuten harsatna hrang hrang an tawhte chu bawhzui a tum thu leh anmahni nena hmaichhana sawiho a tum thu a hrilh bawk.
MHMSA President Pu P.Manliana pawhin thu sawiin multi-purpose worker-te chu Mizoram hmun hrang hranga awm, Zoram chhim leh hmar, chhak leh thlang dap chhuaka awmin, thingtlang kilkhawr ber berah te an awm a; khaw tam tak doctor an thlenphak lohna hmun tam takah doctor ten an tih ngei ngei tura ngaihte pawh doctor indaihlohna avangin, mihringpuiten nun an chan ai chuan tuar pawh huamin risk lak ngai chunga an tih leh thawh a tam a ni, a ti a. Vawiin an General Assembly pawh chhim chak hle mahse an hna tulna avanga Health Worker engemawzat chu an zingah an tel theih loh thu a sawi bawk. MHMSA Secretary i/c Info. kaihhruaina hnuaiah kumin chhunga an Member-pui boral ta mi 6 sunna hun hman a ni bawk.
