No.2765/2021-2022
Aizawl, 28th October, 2021 : “Mizoram Hriselna Kailawn Dawhtute” tih lehkhabu Dr. B. Thangdailova ziah chu vawiin chawhnu khan Health Minister Dr R. Lalthangliana’n Aizawl Civil Hospital Conference Hall-ah a tlangzarh.

Tlangzarhna inkhawmah hian Health Minister chuan thusawina hun hmangin COVID-19 hripui leng mek dona kawngah Health department a thawk mekte leh lo thawk tawh thinte an chhuanawm a tih thu a sawi a, pension tawhte mai bakah sawrkara thawk lo health sector lama thiamna nei chi hrang hrang daktawr, nurse, laboratory technician etc., te kawng chi hrang hranga an rawn pen chhuak thin hi kan hlawkupuiin kan ngaihlu em em a ni a ti a ni.

Health Minister chuan Mizote zinga daktawr thiam kan neih hmasak berte zinga mi Dr. B. Thangdailova’n Mizorama hriselna kawnga kan than chhoh dan kimchang leh chipchiar taka ziaka, a bu hial chhuah theiha a peihfel chu chhuanawm a tih thu sawiin, zofate tana lehkhabu rotling, midangte tana chona tha tak a ni a, kum upat hnu lamah Mizoram hmangaih taka, a tawnhriat leh a thil hriatte Zoram tana tangkai tura lehkhabu a sual chhuak hi thil chhinchhiah tlak a ni a ti a ni.

Health Minister chuan COVID-19 hripui leng avangin Health department in hmachhawp a neih tam takah hma a lak chunzawm theih loh a, hripui leng dona kawnga hmalaknaah sum leh pai tam tak mamawh thin a ni a, Finance Department in Zoram dam nan an mamawh apiang an tihhlawhtlin sak thin avangin lawmthu a sawi a, hetih rual hian Mizoram budget khawih buai si lovin sawrkar laipui atanga scheme hrang hrang NESIDS etc., leh PM Cares bakah World Bank leh JICA atang ten project tha tak tak Zoramin hriselna lama hma a sawnna tur kan thawk reng theite hi thil lawmawm tak a ni, a ti a. Sub-Centre tia sawi thin pawh Health & Wellness Centre ah hlankai (upgrade) mek a nih thu sawiin tunah hian sub-centre 275 kan upgrade tawh a, sub-centre 80 vel upgrade hmabak kan la nei a, heng centre te hi sawrkar laipui duhdan angin Health & Wellness Officer train chhuah ten an enkawl vek a, tunah hian World Bank Project kan hmuh Mizoram Health Strengthening System kaltlangin cheng vaibelchhe 280 hmangin kan tiphuisui chhunzawm leh dawn a, kum 5 hnuah hmel danglam dawrh khawpin hma kan sawn ka beisei a ni, a ti a. JICA tanpuina a Cancer Superspeciality Hospital sak turte, NESIDS hnuaia ZMC tihmasawnnate leh PM cares hnuaia district tina oxygen plant dah a nih thute bakah hmalakna chi hrang hrang a tarlang a ni.

Health & Family Welfare Board Vice-Chairman Dr ZR Thiamsanga, MLA pawhin vawiina lehkhabu tlangzarh tak ziaktu Dr B. Thangdailova chu daktawr hna a thawh chhunga rei tak a lo hrawn tawh thu sawiin, daktawrte hi kan hnaah kan buai em em a, kan pension hnu thleng hian kan buai em em thin a ni a ti a. Research han tih a lehkha ziahna hunte kan nei thin lova, Dr. B thangdailovan hetianga lehkhabu rotling, research ti tute tan pawha rinchhan tlak a rawn buatsaih hi a ropui takzet a ni a ti a. Thangtharte tan mai ni lo, daktawr thawk mekte tan leh mipuite tan pawh he lehkhabu hi a tangkai takzet dawn a ni, a ti.

“Mizoram Hriselna Kailawn Dawhtute” hi rs. 250/- man a ni a, he lehkhabu ah hian Kumpinu hunlai (1890-1947) atanga District Council, Union Territory leh State kan nih hnu tun thlenga Mizorama hriselna kawnga hma kan sawn dan kimchang taka tarlan a ni.

Vawiin lehkhabu tlangzarhna hun hi Dr Rosangluaia, President, IMA in a kaihruai a, Dr. N. Pallai, DHS (rtd) leh daktawr senior leh pension tawh thahnem takin an hmanpui a ni.