No.2631/2021-2022

Aizawl, 18^th October, 2021 : Vawiin khan Health Minister Dr. R. Lalthangliana’n National Deworming Day, 2021 chu internet kaltlangin a hawng.  

Hawnna thu a sawiah Health Minister chuan naupangte an thanlen kawngah hriselna tha an neih theih nan sawrkarin kawng hrang hrangin hma a la a, chung zinga pawimawh tak pakhat chu rulhut laka naupangte fihlimna hi niin, hemi pual hian National Deworming Day (NDD) kan hmang thin a ni, a ti a. Kumdangah chuan National Deworming Day hi Sikul leh Anganwadi Centre ah te ni khatah hman thin a ni a. Tun tumah erawh chuan COVID 19 hripui vanga Sikul leh Anganwadi Centre te khar a la nih avangin he programme hi hman a remchang ta lova. Chumi avang chuan ni khat chauh a hmang lo in National Deworming Day hi kar hnih chhung October ni 18 atanga ni 30, 2021 hian hman ani dawn a, round hmasa aia thahnem zawkin an ei ngei theih nan tan lak theuh kan tum dawn nia a ti a. Mizoram chhunga naupang leh tleirawl kum 1 – 19 inkarte a thlawn in Rulhut hlo hi pek tum a ni a, hmaih awm hauh lova Albendazole mum (rulhut damdawi) hi lo ei tir theuh turin ka ngen a che u,a  ti a ni.

Minister chuan rulhut pai lo turin kan tih theih awlsam tak a awm a, chung te chu – kut silfai that te, thlai leh thei eitur silfai that te, tui thianghlim chauh in te, ekin tha leh thianghlim taka inthiar te, eitur khuh that te,  in leh a vel vawn fai te leh khawlaiah pheikhawk bun thin te hi a ni,a ti a. Health Department bak ah School Education Department, Women & Child Development, Rural Development Department leh Public Health Engineering Department thawk tu te thawh hona leh thawhrimna avanga National Deworming Day hi hmang thei kan ni a, an chungah lawmthu ka sawi rualin he ni hi hlawhtling taka kalpui a nih theih nan duhsakna sang ber ka hlan a ni, a ti. 

Naupang leh tleirawl zawng zawngte rulhut laka an lo fihlim theih nan National Deworming Day (NDD) hi India ramah kum 2015 ah khan State/UT 11 ah bul tan a ni a, a hlawknate hmuh a nih hnuin India ram pumah February 2016 atang khan hman chhunzawm a lo ni ta a ni. He hmalakna hi rulhut pai vanga natna hrang hrang thleng theite, thisen tlakchhamnate leh naupang thanthu umbo nan a ni a, kum 1 – 19 inkarte tan kumtin vawihnih (2) rampum huapin a rual a rulhut hlo eitirna tur hun hi kalpui a lo ni ta a ni.

Mizoram ah pawh February 2016 ah hman tan niin hma kan sawn chho ve zel a, round hnuhnung ber February 2021 a neihah khan naupang kum 1 atanga kum 19 inkar  97.9% laiin he damdawi hi an ei thei a ni.

He programme National Deworming Day (NDD) hi Mizoram district zawng zawngah a rual a hman a ni dawn a, naupang leh tleirawl kum 1-19 tawh phawt chu a huam vek a, a thlawnin Rulhut Hlo (Albendazole) eitir thin an ni a. Naupang leh tleirawl kum 1 – 19 inkar ten kim taka rulhut hlo an ei theih nan National Deworming Day hi kumin ah chuan kar hnih chhung hman a ni dawn a. Hemi hun chhung hian in tinah ASHA te kal in Albendazole hi an pe dawn a ni. Rulhut pai avanga thisen tlakchhamna leh taksaa harsatna hrang hrang awm theite venna atan National Deworming Day hi hman thin a ni. National Deworming Day hi naupang leh tlawirawlte hrisel zawkna atan leh an than lenna kawnga harsat hrang hrang awmtheite sutkianna atana hmalakna pawimawh tak a ni.

Dosage for Albendazole 400mg tablet

                                         NDD ACHIEVEMENT, MIZORAM

National Deworming Day, 2021 hawnna inkhawmm hi Dr. Eric Zomawia, Mission Director in a kaihruai a, Dr. Lily Chhakchhuak, SPO (RCH) & DD (FW) in NDD chungchanga hmalakan leh thil pawimawh dang sawifiahna hun  a hmang a, H&FW Department, School Education Department, Women & Child Development Department, Rural Development Department leh PHE Department aiawh ten thusawina hun an hmang bawk a ni.