No.2630/2021-2022
Aizawl, 18th October, 2021 : Health Minister Dr. R. Lalthangliana chuan hmai tuamna vuah tura beihpuithlakna “All Mask Campaign” hman lai mek chu tun thla tawp thlenga pawhsei a nih thu vawiin khan Virtual Meetingah a sawi. Virtual meetingah hian District tina Deputy Commissioner te, Chief Medical Officer (CMO)te leh District Information & Public Relations Officer (DIPRO) te an tel a ni.

Health Minister chuan COVID-19 dona kawnga hmalakana kawng hrang hrangah leh mipuite hnena zirtirna kawng hrang hranga kalpui chungchangah District tina bawrhsapte leh DIPRO ten Health department hmalakana tha taka an thlawp thin avanga lawmthu sawiin, hmai tuamna vuah tura beihpuithlakna (All Mask Campaign) chungchanga an hmalaknaah lawm thu a sawi a, kan dinhmun thlirin mask vuah tura inzirtirna chu ngawrh lehzuala kalpui a tula hriat a ni a, hei vang hian All Mask Campaign hman lai mek October ni 20, 2021 a tawp tura tih chu October ni 31, 2021 thlengin kan pawtsei leh a, hetih chhung hian ngawrh lehzuala mask vuah a him zia kan inzirtir a tul dawn a ni, a ti a. State-level All Mask Campaign Implementation Team sawrkarin a din thu leh anni hian ruahmanna thar an rawn siam tur thu a sawi bawk a, he Campaign chhung hi chuan nikhat kar danah tal hmalakana review meeting nei thin turin DC te a chah bawk a ni.

Health Minister chuan khawvel leh India ram State dangte kalpui dan leh WHO, CDC-USA leh ICMR te ngaihdan zirchiangtu State-level Expert Team on COVID-19 Management rawtna angin symptom-based approach a sample test kalpui turin order tihchhuah thuai a nih tur thu a sawi a, hemi chungchangah hian mipuite leh khawtlang hruaitute hrilhfiah kawngah nasa taka tan lak a ngai tih a sawi bawk a, inchhungkhura natna khirhkhan veite leh kum upa, tar chaklo neite fimkhur pui leh venpui a ngaih zia uar taka sawiin, hetih kawngah hian nasa lehzuala inzirtir a tul tih a sawi bawk a ni.

Vaccine chungchang pawh sawilangin Health Minister chuan vaccine la la ve lote kan inkhawrhchhuah a ngai a, NGO te leh tlawmngai pawlte thawhpui a pawimawh tih sawiin, a bik takin hnam bil/ tawng bil hmang Tlawmngai Pawlte leh khawtlang hruaitute nen theihtawp chhuah tlan a ngai tih a sawi a ni.

District tin atangin DC, CMO leh DIPRO ten report an pe a, report tlangpui khaikhawmnaah chuan tun dinhmunah Siaha leh Saitual district tih lohah chuan positive hmuhchhuah thar zat zawi zawiin a tlahniam a, hetih rual hian kan fimkhur lehzual sauh a tul a, kan tan tlan chuan reiloteah kan ziaawm ve mai a rinawm thu sawi a ni a, symptom neite leh mahni inringhlel te a rang thei ang bera sample test nghal a pawimawhzia mipuite zirtir chian lehzual a pawimawh thu sawi a ni bawk a, sawrkarin sample test chungchanga SOP thar a tichhuak tur chu a lawmawm an tih thu an sawi bawk a, Monoclonal Antibody Cocktail (MAC) pawh thingtlang lam ami te pawhin an hmuh zung zung theihnan District tinah dah dan ngaihtuah a tha a an hriat thu an sawi bawk a ni.

Heng bakah hian COVID-Appropriate Behaviour (CAB) zawm tura inzirtirna thar thawh leh a tul thu sawi niin, CAB zawm lote hremna khauh zawka kalpui a tula hriat a ni bawk a, Mask vuah tura inzirtirna kawng hrang hranga uar taka kalpui chu a pawimawh hle tih sawi tlan a ni bawk.