435/2023-2024

Health Minister Dr. R. Lalthangliana chuan vawiin khan MINECO-a a pisaah kum 2020-21 chhunga Mizo zinga National Florence Nightingale Award dawngte chawimawina hun a hmanpui.

He hunah hian Dr. R. Lalthangliana chuan Mizo zinga National Florence Nightingale Award dawngte chawimawina hun, International Nurses Day puala hman chu a lawmawmin a inhmeh hle a ni a ti a. Mizo hmeichhiate zinga dawng an awm thin chu ropui a tih thu leh lawmman dawngte chu midangte tana inpe leh malsawmna ni chhunzawm zel turin a fuih bawk. Minister chuan nurse hna thawk mekte leh pension tawh te, medical lama thawkte chu an hna pawimawh zia hria a, damlo leh chan chhe zawkte hmangaihna, duhsakna leh khawngaihnha tak tak nena enkawl zel turin a chah a, damlo enkawl chu a hahthlakin hreawm chang awm mahse tawngkam tha nen damlote chhawn zel turin a fuih. Health Minister Dr. R. Lalthangliana chuan hriselna a pawimawh thu sawiin hriselna hloh chuan engkim hloh ang an ni tiin hriselna ngai pawimawh deuh deuh turin mitinte a sawm bawk a ni.

Vawiin National Florence Nightingale Award dawngte chawimawina inkhawm hi Pi Esther Lalruatkimi, Principal Secretary, H & FW Department-in a kaihruai a. Joint Director (Nursing) Pi Lalchhanhimi chuan report pein Dr. PC. Lalramliana, Principal Director, H & FW Department-in lawmthu sawiin hun a khar.

Nurse hnathawk thate chawimawina 'National Florence Nightingale Award' hi kum 1973 atanga kalpui tan a ni a, Mizoram Nurse 14 ten he Award hi an dawng tawh a ni. He Award hi Nurse zirtirtute, damlo enkawla hospital-a thawkte leh public health-a thawk ANM-te tan dil theih vek a ni.

Vawiin International Nurses Day puala National Florence Nightingale Award 2020-2021 dawngte chu :

1. Pi C. DengthangpuIi, Health Supervisor (Rtd) - 2020

2. Pi Vanlalthuami, Health Worker - 2020

3. Pi Vanlalrovi, GNM Staff Nurse - 2021

Heng Awardee-te hi chawimawina certificate leh sum hlan an ni.

NATIONAL FLORENCE NIGHTINGALE AWARDEE CHANCHIN TAWI:

1). Pi C. DENGTHANGPUII, ANM: Pi C. Dengthangpuii hian ANM Course chu 1982-ah Health Worker Training School, Civil Hospital Aizawl (Health Worker Training School Kulikawn a sawn tak) atanga zirchhuakin, Health Worker hna hi kum 1982 atangin a thawk tan a. Kum-2019 April thlaah Health Supervisor-ah kaisangin a pension a. Vanduaithlak takin March, 2023 khan chatuan ram min pansan ta a ni.

Pi C. Dengthangpui' in Award a dawn chhan:- Pi C. Dengthangpuii hian New Vervek Health Sub-Centre a a a thawhlai June ni-10, 1992 khan mipa naupang Lalropuia kum-13 , Malaria PF leh PV inkawpa damlo, nikhaw hrelova awm tawh chau tak mai, hmunpui zawk lam pan tura tihchet ngam tawh loh chu theihtawpa enkawlin a nunna a chhanhim a ni.

2). PI VANLALTHUAMI, ANM: Pi Vanlalthuami hian ANM Course-chu 1988-ah Health Worker Training School, Civil Hospital Aizawl (Health Worker Training School Kulikawn-a sawn tak) atanga zirchhuakin, Health Worker hna hi kum 1988-a thawk tanin tunah hian Theiriat Sub-Centre, Lunglei-ah post mek a ni.
Florence Nightingale Award a dawn dan: Pi Vanlalthuami Sertlangpui Health Sub-Centre a a thawh laiin ni-23 October, 1993 khan Pi Kawlziki W/o Pu K. Rosangzuala fa-19na tur fanu a chharsak a, mahse naute a pian hnu hian a hlam a tan avangin thi nasa takin a put a, hmunpui pan turin motor a awmloh bakah khawihchet ngam a ni lo va. Darkar 6 chhung lai mai theihtawp chhuaha a enkawl hnuah a hlam tang chu la chhuakin a nunna a chhanhim a ni.

3). PI VANLALROVI, GNM: Pi Vanlalrovi hian GNM Course hi 1992-ah School of Nursing, Civil Hospital Aizawl tuna Mizoram College of Nursing nita atangin a zo a. Tunah hian Thingsulthliah PHC-ah Staff Nurse hna a thawk mek a ni.

Florence Nightingale Award dawn chhan:

1. Dt 18.7.2023 khan Pi Lalhmunpuii kum-38 Serchhip khua, naupai lai mek thiput nasat avanga Civil Hospital Aizawl refer chu Thingsulthliah Dawrkawn an thlen laiin nikhaw hre lovin a awmzui a, Pi Vanlalrovi kalchhuak chuan lo hmuin Thingsulthliah PHC-ah rangtakin a hruai chho a, theihtawp a enkawlin a nunna a chhanhim a ni.

2. Ni 27.7.2013 tlai dar-3 vel khan Stephen Ramnunpuia kum-18 chu bus tlanlai atanga tlain a hnar leh a bengahte thi nasa tak a chhuak a, a kaih zui bawk a. Pi Vanlalrovi chuan a theih anga bawihsawm nghalin a nunna a chhanhim sak a ni.

3. Ni 15.3.2014 khan Kapsianthanga kum-30 chuan ama nunna lak tumin rannung thahna hlo a in a, nikhaw hre lova a awm chu Thingsulthliah PHC-ah an rawn hruai a, Pi Vanlalrovi chuan a pum te rangtaka lo thuah sakin a nunna a chhanhim sak a ni.