588/2025-2026

Dated Aizawl the 14 May, 2025 : Vawiin khan Regional Institute of Paramedical and Nursing Sciences (RIPANS) a Final year M.Sc Nursing zirlaite chuan RIPANS Conference Hall-ah, ‘Investing in Nurses, Investing in Health: Empowering the future of healthcare’ tih thupuia hmangin ni hnih awh tur 'Continuing Nursing Education program khuhhawnna an nei a. He hun hi Pi Lalrinpuii Hon'ble Minister, Department of Health & Family Welfare chuan khuallian niin a hmanpui.

Khuallian Health & Family Welfare Minister Pi Lalrinpuii chuan kalkhawmte hmaah hian thusawiin, RIPANS chu India Hmarchhaka Nursing zirna in changtlung ber a nih thu a sawi a. Nurse te chu mipuite hriselna kawnga dinhmun pawimawh tak chelhtu an ni tih inhre reng turin a chah a. Sawrkar pawhin mipuite hriselna chu a ngaipawimawhin, Mizoram Universal Healthcare-te pawh mi tin huapzo turin a kalpui tan mek tawh tih a sawi a. Hengte hre reng chung hian nurse-te pawh mipuite tana  rawngbawltu an nihna chu vawng nung zel turin a chah nghal bawk a ni.

Hawnna hun hi Prof Dr Sanjay D Sawanta, Director, RIPANS chuan kaihruaiin, Pi C.Lalramdini, Principal in charge,RIPANS in kalkhawmte lo lawmna  thu a sawi a. RIPANS hotute atangin thusawi ngaihthlak a ni a. Pi Laldinpuii Sailo, tutor, College of Nursing, RIPANS chuan lawmthu sawiin hawnna hun hi a khar a ni.

Training-ah hian Nursing zirna in leh Damdawiin hrang hrang atangin Nursing zirtirtu, Senior Nursing Officers leh Nursing Officers 30 te an tel a.  Thupui  hrang hrang zirtirna nei turin mithiam bik panga sawm an ni.

RIPANS hi Ministry of Health & family Welfare, Govt of India hnuaiah 1996 khan  din a ni a. North east state hrang hrang atangin Zirlai 800 chuang awmin, Bachelors programme 5 leh Master programme 3 bakah PhD zirna programme 1-te  a awm mek a ni.