3067/2024-2025

Dated Aizawl, the 19 November, 2024: Vawiin zing dar 9:45 khan Health & Family Welfare Minister Pi Lalrinpuii chuan Planning and Programme Implementation Department Conference Hall, Tennis Court Aizawlah, ni thum awh Nursing Administrator-te tana Training neih tur chu Khuallian niin a hawng.

Hawnna hunah hian Khuallian Health Minister Pi Lalrinpuii chuan training turte tana thu chah sawiin, Nurse-te pawimawhna leh Nurse Administrator-te tana training buatsaih chu ram tana hmasawnna pawimawh tak a ni tih a sawi a. Nurse-te chu mipui vantlang hriselna chungchangah mawhphurhna sang tak nei an nih avang leh an mawhphurhnate chu inpekna pumhlum nen chauhva hlen theih a nih avangin, anmahni enkawltu Nurse Administrator-te chuan mawhphurhna pawimawh lehzual an nei tih a tarlang a. Nursing Administrator-te pual liau liaua training buatsaih chu a pawimawh hle tih sawiin, Health Minister chuan "Kan hnathawhna kawng engkimah training chu hman tlak lehzuala min chhertu, kan hnathawh tisawt lehzualtu a ni", a ti a. Nurse-te chu hriselna kawnga a pawimawh berte zinga mi (heart of the health) an nih avangin, anmahni enkawltute  chu mawhphurhna hlu leh zahawm tak an neihte vawng reng turin a fuih a; training chu a tangkai thei ang bera hmang turin a chah a ni.

Vawiin training hawnna hunah hian Pi Lalchhanhimi, Joint Director, Directorate of Nursing chuan kalkhawmte lawmna thu leh training kaldan tur tlangpuite tarlangin, Dr. Eric Zomawia, Director, National Health Mission chuan kalkhawmte fuihna thu a sawi a. Pi Kavita Khasa, Deputy Nursing Advisor to Government of India, Ministry of Health & Family Welfare pawhin training turte fuihna thu leh Nurse-te mawhphurhna chungchang a sawi bawk a. Hemi hnu hian training hi neih chhunzawm nghal a ni.