3066/2024-2025

New Delhi, the 19th of November, 2024: New Delhi a châm mek Pu Lalnghinglova Hmar, Minister of State, Sports & Youth Services leh LESDE Department chuan nimin khan Mizoram Sports hmasawnna tur ngaihtuahin Sawrkar leh Corporate-a mi pawimawh hrang hrang a hmu.

Sports Minister Pu Lalnghinglova Hmar chuan nimin chawhma dar 10:00 ah Pi Mio Oka, Country Director, Asian Development Bank chu ADB office-ah kawmin Olympic Games 2036 leh National Games 2032 a Mizoram hmathlirte a sawipui. Mizoram-ah sports kaltlanga khawpui hmasawnna (urban development), tourism, zirna leh skill development lian tham kalpuina remchang a awm a, chutiang ata’n chuan a hmunhma tur pawh Sawrkarin a neih thu a sawi. Mizoramin National Games 2032 thleng turin hmathlir a nei a, a tihlawhtling turin Asian Development Bank-a Mizoram sports project awm mek chu chak zawka kalpui a, thawhho a duh tih a sawi a ni.

Asian Development Bank hotute chuan Mizoram Sports Minister in hmathlir thui tak a nei chu phurawm leh lawmawm an tih thu an sawi a. Zau zawka inrawnkhawm turin December thla chawhma lamah ‘Consultation Mission’ nei a Mizoram-a an zin tur thu an lo hrilh a ni.

Minister Pu Lalnghinglova Hmar chuan Pu Yugal Joshi, Programme Director & Adviser for Northeast, NITI Aayog pawh nimin khan NITI Bhawan-a a office-ah kawmin Mizoramin sports-a hmachhawp hrang hrang a neihte a tarlang a. NITI Aayog hotute chuan tha taka lo dawngsawngin, Mizoram Sawrkarin line Ministry hrang hrang hnuaia project a thehluhah NITI Aayog puihna leh thurawn an mamawh chuan pui tura an inpeih reng thu Minister chu an lo hrilh a ni.

Mizoram Sports Minister hian nimin vek khan Mizoram House, Chanakyapuri-ah HCL Foundation (Sports) hotute a kawm a. Mizoram tuam chhuaka sports coaching kalpui tur hmachhawp leh, Mizoram Sawrkar hnuaia sports academy awmte tihchangtlun kawnga thawhho dan tur an sawiho a ni.

Nimin leh vawiina meeting-ah te hian Pu John Tanpuia, Jt. Secretary, Sports & Youth Services Department leh Pu H. Lalramenga, PS te’n Minister hi an tawiawm a ni.