Vawiin chawhma khan The Delhi Network of Positive People, International Treatment Preparedness Coalition leh Coalition Plus tangkawp buatsaih North-East India Regional HCV Community Workshop chu Hotel Floria, Dawrpui, Aizawlah neih a ni a Dr R Lalthangliana, Minister, Health & Family Welfare Department chu khuallian a ni.

Minister Dr R Lalthangliana chuan DNP+ ten Hepatitis C Virus chungchanga inzirtirna an rawn buatsaih chu lawmawm a tih thu sawiin Mizoram a NGO te chu pawl tangkai leh chak tak, hmasawnna atana inkaihhruai leh inzirtir kawnga thawh hlawk tak an nih thu a sawi a, DNP+ te leh Mizorama NGO hrang hrangte thawhhona chuan Hepatitis C Virus venna kawng ah rah tha a chhuah ngei a beisei thu a sawi. Minister chuan Hepatitis C chu damdawi hmansual ching te zingah kai an tam thu sawiin Mizoram sawrkar hnuaia Healthcare Scheme ah pawh Hepatitis B leh C natna te chu rin luh tel a nih thu a sawi a, a inenkawlna hi Civil Hospital, Aizawlah kalpui tan a nih thu a tarlang bawk a ni. Dr R Lalthangliana chuan Mizoramah National Viral Hepatitis Control Programme kalpui tan a nih thu sawiin hemi hnuaiah hian Hepatitis C leh B veite a thlawn a enkawlna pek te, High risk group te hnena a thlawn a test neih te, he programme hnuaia sawrkar damdawi ina thawktute a thlawn a hepatitis B vaccine pek te leh Viral Hepatitis chungchang a inven dan leh enkawl dan te zirtirna uar zawk a kalpui a nih tur thu a sawi bawk a ni.

Vawiin workshop hawnna hun ah hian Pi Lalmalsawmin’ kalkhawm te lawmna thu a sawi a, Elaine Haokip, Program Manager, DNP+ in workshop kalpui dan tur tlangpui tarlanna hun te neiin Pi Rosalynn Lalawmpuii, Consultant, DNP+ in lawmthu sawina hun a hmang bawk a ni.

North-East India Regional HCV Community Workshop hi ni hnih awh tur niin Hepatitis C Virus chungchang, India leh India hmarchhak state a a darh mek dan te, enkawl dan leh mipuite hnena NGO kaltlanga inzirtirna hlawk zawk kalpui dan te zir ho a ni dawn a, Mizoram Kohhran hrang hrang aiawhte; Mizoram Viral Hepatitis Control Program; TREAT Asia, Bangkok; Assam Drug User Network; Arunachal, Tripura Network of Positive People; Haryana PUD Network; Community Network for Empowerment, Manipur; Medicins Sans Frontiers, Manipur; Meghalaya Drug Users’ Union, Meghalaya; Nagaland State Network of PLHIV leh NGO hrang hrang aiawhte an tel a ni.