Vawiin chawhma khan Whitestone Conference Hall, Ramhlun North-ah Positive Women Network of Mizoram (PWNM) ten kum 10 an tlin lawmna programme an hmang a. Health & Family Welfare Minister Pu Lal Thanzara chu Khuallian a ni a. Minister hian HIV Documentary film ‘Beiseina’ tih chu a tlangzarh nghal a ni.
Khuallian Pu Lal Thanzara chuan Mizoram chhunga HIV/AIDS dona kawngah a natna vei ngei ten pawl anga intelkhawm a, hmuhsitna leh endawngna hmachhawn ngama kum 10 lai hna an lo thawh tawhna chu chhuanawm a tih thu a sawi a. Midangte tana an hnathawh chuan mi tam tak tan HIV/AIDS natna a pumpelh tir ngei a beisei thu a sawi a. HIV/AIDS natna chu kan hmelhriatna ala reilo chungin a darh nasa tawh hle a ni, a ti a. Minister chuan Sawrkar, Kohhran leh pawl hrang hrangin he natna veite enkawlna kawngah leh an hmakhua ngaihtuahna kawngah nasa takin hma kan la vek a, heti chung hian a darh zau zel a ni tiin nasa zawka hmala in kan thawhho tlan a ngai a ni, a ti a. HIV hrik paite tana enkawlna leh a thlawna damdawi sem chhuahna chu ART (Anti Retroviral Therapy) Centre kaltlanga tih thin a nih thu a sawi a. India rama a vawikhatna leh a bul tanna atan ART damdawi sawrkar damdawiin chauha semchhuah thin chu PWNM atangin pekchhuah tura ruahmanna a awm chu lawmawm a tih thu a tarlang a. ART damdawi pawimawhzia leh a hun taka ei reng a tulzia ngai pawimawh lehzual turin leh damdawi ei nachang hrelote pawh hrilh hretu ni turin kalkhawmte chu a chah a. HIV/AIDS darh zel tur venna kawnga theihtawp chhuah turin duhsakna a hlan nghal a ni.
Positive Women Network of Mizoram (PWNM) hi kum 2007 khan din niin tun dinhmunah hian member 4000 vel an awm mek a. HIV/ADIS natna kawng hrang hranga kai mi 40 vel in PWNM hi an din a. PWNM-in a tum chu – A vei tawh ten nun pangngai tak an neih theihna atana hma lak; HIV/AIDS veite chunga thinhrikna leh endawngna tih tlem; Natna darh zau zel tur ven tih te a ni a. PWNM hian MSACS hnuaia PLHIV DIC (Drop-in-Centre) Lunglei district leh ART Centre an enkawl a. National AIDS Control Organisation (NACO) leh The Global Fund to Fight AIDS, Tuberculosis and Malaria (GFATM) hnuaia Care & Support Centre, Aizawl District an enkawl a. State Legal Service Authority hnuaia Legal AID Clinic an enkawl bawk a ni.
PWNM Managing Board Chairman Pi Lalparmawii chuan inlawmna thu a sawi a. PWNM President Pi Vanlalruati chuan PWNM dinchhan leh an hnathawhte a sawi a. Pu Rochungnunga’n HIV Documentary film ‘Beiseina’ chungchang thusawina hun a nei a. PWNM Vihaan Coordinator Pu PC Lalhmangaihna chuan lawmthu sawina in hun a khar a ni. Lawmna Programme ah hian NGO hrang hrang an tel a ni.
