2956/2022-2023
Aizawl the 6th December 2022 : Vawiin khan Health & Family Welfare Minister Dr R Lalthangliana chuan Pachhunga University College, National Service Scheme (NSS) ten kum 50 an tlin lawmna puala thisen pek runpui PUC campus a an buatsaih chu khuallian niin a hmanpui.
Dr R Lalthangliana chuan vawiina thisen pek runpui PUC in an hmang thei chu a lawmawm a tih thu a sawi a. Thisen pe tura hriselna tha neih a ngaih avangin zirlai kalkhawmte chu an taksa vawng uluk turin a chah a. Hriselna atana ke a kal uar a pawimawh thu sawiin, eitur tui ringawt aiin taksa tana tha ei nachang hre turin zirlaite chu a fuih bawk. Mizoram chu ziak leh chhiar thiam tamna, state ralmuang leh Kristian ram a nih avangin hriat a hlawh a ni, a ti a. Hetiang a nih rual hian thiamna tak tak neih kawngah hma kan sawn a ngaih takzet thu a sawi. All India Service leh Central Service mai bakah Zoram Medical College leh JICA Project hnuaia din tur Cancer Superspeciality Hospital-ah te thiamna bik neih ngai thilah ram leilung fate lak tur an awm lo thin chu a rual awh thlak takzet a ni, a ti. Pachhunga University College chu college entawntlak ni zel turin leh NSS thawk tha ber ni zel turin duhsakna a hlan a, midangte tana malsawmna ni a thisen pek uar zel turin kalkhawmte chu a sawm bawk a ni.
He huna thusawitu dang Dr C Zohmingliani chuan thisen thliar nana khawl tha leh tangkai tak Apheresis machine chu Health Minister hmalakna zarah Aizawl Civil Hospital-ah bun thuai a nih tur thu a sawi a. Tunlaia natna hluar tak Dengue vei enkawlnaah he khawl hi a tangkai dawn hle a ni, a ti.
PUC Principal Prof H Lalthanzara pawhin thusawiin PUC motto chu ‘Learning & Service’ a nih angin zirna lama thangchhuah mai bakah vantlang leh ram tana hnathawh chu college tum ber pakhat a nih thu a sawi.
HDFC Bank aiawhin Pu John Varte chuan HDFC Bank in tlawmngaia thisen pek kawnga tha an lo thawh tawhna hrang hrang te a sawi bawk a ni.
Pachhunga University College hian Mizoram zirna in zingah kum khat chhunga tlawmngaia thisen pe hnem ber nihna a hauh mek a. Sawrkar kum kallai mekah thisen unit 521 pe tawhin, unit 1100 pek tlin ngei tumin hma an la mek a ni.
