2955/2022-2023
Lunglei the 6th December, 2022 – Vawiin khan Lunglei District Disaster Management Authority (DDMA) buatsaihin Lunglei khawpuiah lirnghing a thlen thulha chet lak leh chhanchhuahna hna thawh dan tur enchhinna Earthquake Mock Drill neih a ni.

He Mock Drill atan hian National Disaster Response Force (NDRF) 1st Battalion, Guwahati atangin Deputy Commandant Pu HR Yadav hovin NDRF sipai 23 an lo kal a ni.

Zing dar 11:00AM ah lirnghing hi Lunglei khawpuia thleng anga awm tirin, District Emergency Operation Centre (DEOC) ah Incident Response Team members te an tlan khawm nghal a. Lunglei District Emergency Operation Centre (DEOC)-ah lir a nghing thu hriat a nih veleh siren tih rik a ni a. DEOC atang hian Lunglei DDMA Chairman Lunglei DC Pu Kulothungan A hovin chiatrupna thlen thulha mawhphurtu hrang hrang - National Disaster Response Force (NDRF), State Disaster Response Force (SDRF), Mizoram Police, Fire & Emergency Services, H&FW, MPRO, Quick Response Team, Traffic Police, PHE, Power & Electricity Department, VC leh YMA ah te chhiatna thlenna hmun leh thlen dan rang takin hriattir an ni a. Saikuti Hall, Convention Centre leh Government High School, Chanmari ah te lirnghing avanga hliam tuarte chhanchhuah hna leh nunna chante lakchhuah hna thawh niin Civil Hospital Lungleiah an phur thleng a. District Disaster Management Plan ina chhiatna a lo thlena mawhphurhtu chi hrang hrang a ruatten a tak ang thei ber turin hna an thawk chhin a ni.

Lunglei DDMA Chairman, MPRO team Incident Response System (IRS) hnuaia mawhphurtu dangten DEOC hi an thutchilh a. Incident Commander ruatsa ten chhiatna thlen dan te, thi leh hliam tuar zat te leh a tul apiang a khat tawkin an rawn hriattir reng a ni.

Mock Drill neih zawh hnu hian Lunglei DC Conference Hall-ah a tlirletna (debriefing) buatsaih zui leh a ni a. NDRF Deputy Commandant Pu HR Yadav leh Incident Commander ten report an pe a. NDRF hotute hian Lunglei District inpuahchahna leh hmalak dan te tha an tih thu leh mawhphurtuten an chanvo tha taka an hlen chhuak ni a an hmuh thu an report a ni.  Review meeting-ah hian member kalkhawm ten an hmuh dan sawihovin felhlel lai leh siamthat ngai nia an hriat te siamthat dan tur leh hmasawn dan tur rawtna te an ngaihtuah ho a. Lunglei SP Pu Rex Zarzoliana Vanchhawng chuan chhiatna thlena chhanchhuah hna thawhnaah community volunteers-te an pawimawh thu te, YMA, VC leh kohhran kaltlanga awareness uar zawka kalpui a tul thu te leh chhiatna hmuna mipui punghkhawm tur ven vat a tul thu te a sawi a. Lunglei DDMA Chairman Pu Kulothungan A chuan mock drill neih zawh taka mawhphurtute, khawtlang hruaitute leh school hotute hnenah lawmthu a sawi bawk.