842/2023-2024

Aizawl, 19th June, 2023 : Health & Family Welfare Minister Dr R. Lalthangliana chuan vawiin khan DHME Auditorium, MINECO-ah ni hnih awh tur "Workshop on Assessment and Certification of PwD's as per RPwD Act, 2016 (For Specialists and supporting staff)" a hawng.

He workshop hi NIEPMD, Chennai leh State Commissioner for PwD tangkawp buatsaih a ni a, Rights of Persons with Disabilities (RPwD) Act, 2016 in a phut anga rualbanlote dinhmun endik a certificate pek chhuah chungchang zir a ni ang a. National Institute for Empowerment of Persons with Multiple Disabilities (NIEPMD), Chennai atang mithiam rawn kalin zirtirna an pe dawn a, Mizoram sawrkar hnuaia medical officer (daktawr) 40 vel leh an staff te an tel a ni.

Workshop hawnna inkhawmah hian thu sawiin khuallian Dr R. Lalthangliana chuan Mizoramah a vawi khat nan hetiang inzirtirna buatsaih a ni chu lawmawm a tih thu a sawi a, chhunzawm zel chi nia a hriat thu sawiin, rualbanlote enkawlna lama daktawr mithiam bik mamawhna a nasa hle tih pawh sawrkarin a hria a, tin dinhmunah lak belh thei rih lo mah ila daktawr kan neih sa te atangin tih dan ngaihtuah a ni ang, a ti.

Minister chuan rualbanlote chungchang inzirtirna hi kan uar a ngai a ni tih sawiin a bik takin thingtlang lamah te Disability Certificate nei lo an tam em em a, sawrkar hnena beng dar vuah tur dil dawn leh thil dang dangah Disability Certificate tel lo chuan a tih theih si lova, disability survey neih pawh a tul hle a ni a ti a. Chutih rualin Disability Certificate pek chhuah chungchangah fimkhur a ngai em em a, thenkhat a ni lo zawnga hmang mai duh te pawh an awm theih avangin he workshop hian kan hmalakna turah awmzia thui tak a neih ngei ka beisei a ni, a ti.

Vawiin workshop hawn inkhawm hi Pi Vanlaldiki Sailo, Commissioner, PwD in a kaihruai a, NIEPMD, Chennai atanga rawn kal te aiawhin thu a sawi bawk a, Dr PC Lalramliana, Project Director, H&FW Dept in lawmthu sawina in a khar a ni.

RPwD Act, 2016 hnuaiah hian rualbanlohna chi hrang hrang 21 chhinchhiah a ni a. Heng rualbanlohna nei te certificate pe tur hian hetiang lam kaihhnawih daktawr kan neih sa te hian an daih lo nasa em em a, chuvang chuan workshop neih hi a tul hle tih hriat a ni a, workshop hi buatsaih a ni ta a ni.

Tun dinhmunah rualbanlo mi 16000 vel chhinchhiah an ni a, khawpui hrang hrang leh thingtlang khaw hrang hrangah la chhinchhiah loh tam tak an awm bawk a ni. Mizoram sawrkar hnuaiah rualbanlo qouta (PwD quota) a hna hmu mi 100 bawr vel an awm a, skilled leh skilled lo te niin an zingah hian lehkhathiam tak tak, sawrkar hna sang thleng chelh an awm bawk a ni.