Nimin ni 8.6.2010 (Thawhlehni) chawhnu khan Pu Lalrinliana Sailo, Health Minister chuan Referral Hospital,  Falkawn ami hun engemaw chen chawlhsan hnu a chhunzawm leh mek chu a hmunah a tlawh. Tuna awmsa khum 50  bakah  hian khum 170 dah theihna turin Rs.4.62 crores senna tur a thawh mek a ni a, zawh thuai beisei a ni. Minister hi Pu Liansanga, Engineering-in-Chief, Dr. D.Baruah, Director of Hospital, Medical & Education leh Department Officer pawimawh tak tak ten an tawiawm a ni. A building leh an hnathawh dante chipchiar taka enin, hmalak zel dan tur te, a building inhlanchhawn dan tur te pawh sawiho a ni bawk.

Referral Hospital tipuitling tur hian sawrkar chuan theihtawpin hma a la zel a. Central lam nawrna avangin tunah hian hun engemaw chhung atan khum 220 tal function thei tura hmalak mek a ni a, Medical College leh Mental Hospital te pawh awm thei tura ruahmanna siam a ni.