Health Minister Pu Lal Thanzara chuan vawiin chawhnu dar 1.30 khan Regional Institute of Paramedical and Nursing Sciences (RIPANS)-ah kumina Department 6-atang zirlai 157 pass thar te graduation lawmna leh Bachelor of Nursing zirlai tharte lawmluhna Lamp Lighting Ceremony chu a hmanpui.
Kumin hian Bachelor of Nursing, Bachelor of Pharmacy, Bachelor of Science in Medical Laboratory Technology, Bachelor in Optometry, Bachelor of Science in Radio Imaging Technology leh Master of Pharmacy atangin zirlai 157 graduate an awm a, mi 17 in Distinction hmu in, First Division-ah mi 135 leh Second Division-7 ah mi 5 an awm bawk a ni.
Khuallian Health Minister chuan Graduate tharte chu an hlawhtlinna a lawmpui thu sawiin, midang puih hna thawk tura thalai heti zat inpe an awm chu thlamuanthlak a tih thu a sawi a. Discipline hrang hranga graduate tharte zingah hna hmu a thawk mek an awm tawh chu RIPANS zirtirtute thawhrimna leh an inkaihhruaina that zia tilangtu a ni, a ti a. Graduate-te chu hna an thawhna hmunah taima taka thawk zui zel turin leh, RIPANS leh Mizoram tihmingthatu ni zel turin a chah a. India hmarchhak state hrang hrang atanga zirlai lut thar te chu lawmna thu sawi telin Pu Lal Thanzara chuan an zirlaiah leh an hnathawh tur chuam an thlanah hlawhtlinna hmu tura rim taka an thawh beisei thu a sawi a ni.
Health Minister chuan nursing hna chu hna dang tam tak nena khaikhin theihloh, inpekna thuk tak tel lova thawh harsa, hna zahawm leh chhuanawm tak anih thu a tarlang a. Mahni mimal nun dah tha a nitin zantin damlo enkawl leh buaipui chungin mi ze chi hrang hrang hmachhawn tel chu mi tam takin an tlin loh tur hna a nih thu sawiin, nurse tanglai mek te leh zirlaite chu an hna thlanah leh an inpekna chu a fakawm hle a ni, a ti a. Chutihrual chuan an mawhphurhna a san em avangin engtik lai pawha fimkhur taka thawk reng turin leh, midang pui tura an intiamna chu theihnghilh lova, harsatna an tawh chang pawha chhel taka awm turin leh, an chunga miin rinna an nghahna te puitlin thei tura chakna an neih zel a beisei thu Pu Lal Thanzara chuan a sawi a ni.
Khuallian chuan course hrang hranga zirlai titha filawr te hnenah lawmpuina thuziak leh chawimawina a hlan a. Hun kaihruaitu, RIPANS Director Dr. Chawngthangliana chuan zirlai pass chhuakte hnenah citation a hlan a. B.Sc Nursing Ist year zirlaite lawmluhna, Lamp Lighting Ceremony chu Pi Kapzawni, Sr. Lecturer, Mizoram College of Nursing chuan kaihruaiin, graduate aiawh atang tein thusawi ngaihthlak a ni bawk.
RIPANS hi kum 1996 khan North Eastern Council chuan India hmar chhak mi te tan Paramedical leh Health Sciences bik zirna atan a din a ni a. Kum 2007 April thla atangin Sorkar laipuia Ministry of Health & Family Welfare hnuaiah an awm ta a ni. Tun dinhmunah course hrang hrang, heng - B.Sc Nursing, B.Sc Medical Laboratory Technology, Bachelor of Pharmacy, B.Sc Radio Imaging Technology, Bachelor in Optometry-te leh, kum 2014 atanga siam belh, Post graduate zirna, Master of Pharmacy-te awm in India hmarchhak state hrang hrang atangin seat hauh sa (quota) neiin zirlai 690 an awm mek a. RIPANS Director kaihhruaina hnuaiah Paramedical Course chi hrang hrang 20 vel hawn belh tumin hma lak mek a ni bawk. Tunah hian Academic Block, Girls Hostel, Boys Hostel leh Library Building sak thar mek bawk a ni.
