Vawiin tlai khan Chief Minister Pu Lal Thanhawla'n Serchhip District Boxing Hall, Venglai New Serchhip a sak thar chu a hawng a, he hall-a 38th Mizoram State Boxing Championship 2016 kharna programme buatsaih chu khuallian niin a hmanpui nghal bawk a ni.

Chief Minister Pu Lal Thanhawla chuan Serchhip District in Mizorama boxing hall lian ber leh infiamna ruhrel changtlung tak India ramah pawh zahpuiawm lo infiamna hmunhma tha an nei chu lawmawm tiin a lawmpui thu a sawi a. District tinah Boxing Hall kan nei chho mek a, hei hi Sports Minister viak tha tak kan neih avangte leh Boxing Association leh sports association dang hruaitu te thawhrimna vangte a ni a ti. Thil tha neih hi a harsa a, hetiang hmun hma vawn faina leh tih thianghlimna kawngah a hmangtu zawng zawng te hian kan mawh ani tih hi kan hriat theuh a tul a ni tiin duat leh mahni ta anga he hall hi enkawl turin mipuite a chah a. Mizorama boxing lama infiammi ten he hall hi infiamna khawvela an hming an chherh chhoh nan tangkai leh phur taka an hman ngei a duh thu a sawi bawk a ni.

Games & Sports chu thalai ten nun kawng dik an zawhna atan thil tangkai pawl ber nia a hriat thu sawiin Chief Minister chuan kawng diklo an zawh tur leh an thlarau nun thlengin a veng thei a ni, a ti. Zuk leh hmuam leh infiam hi a inhmeh lo tih sawiin he hun a infiammi fuankhawm te chu heng laka fihlim turin a chah a ni.

Boxing Hall hawnna inkhawm hi Pu C. Biakchhawna, President, Serchhip District Boxing Association (SEDBA) in a kaihruaiin Dr.Lalrozama IAS, DC Serchhip in inlawmna thu a sawi a, Pu David Laldintluanga, Secretary, SEDBA in hall sak dan chanchin sawiin a hnen atangin report ngaihthlak a ni.