Zan khat riaka lo zin Union Minister of State, Human Resources Development Pu Mahendra Nath Pandey chuan vawiin tlai khan Mizoram Governor Lt gen (Rtd) Nirbhay Sharma, PVSM, UYSM, AVSM, VSM chu a chenna Raj Bhawnah hmuin Mizoram-a hmalakna tur hrang hrang an sawiho.

Mizoram Governor Pu Nirbhay Sharma chuan Union Minister hnenah Mizoram mamawh a thlen zingah Mizoram University Vice-Chancellor thar tur ruat te, NIT Mizoram Director leh Chairman post hnawhkhah te, Mizorama Hindi teacher-te dinhmun, Central enkawl lai sikul hrang hrang - Kendriya Vidyalaya, JNV leh Eklavya School-a Principal awmlohna hnawhkhawh leh buildingte tihchangtlun chungchang bakah Hindi tihlarna turin Regional centre hawn leh zirtirtute Hindi zirtir thei tura training pek te a sawilang a. Mizoram chu ziak leh chhiar thiam tamna a nih a, chuvangin Higher Secondary level-ah school syllabus rualin skill development course zirtir a pawimawh thu sawiin Governor chuan hei hi thalaite nakin an eizawnna kawngah a tangkai hlea a hriat thu a sawi bawk.

Union MoS Pu Mahendra Nath Pandey chuan Prime Minister-in hmarchhak bial state te hmasawnna tur a ngai pawimawh hle thu leh Central Minister-te chu a thei anga tam hmarchhak bial tlawh turin a hrilh thu a sawi a. Governor-in Mizoram mamawh thil a hnena a thlente chu a rang thei ang bera a lo ngaihtuah sak leh bawhzui tur thu a hrilh.

Union Minister hi Mizoram H&TE parliamentary Secretary Pu H.Zothangliana bakah Prof. Pandey, HoD, Education Department, Assam University te nupain an rawn tawiawm a ni.