Health Minister Pu Lal Thanzara chuan tukin zing khan Vanapa Hall kawtah Run and Ride Campaign Against Cancer rally a vailiam. He rally hi Tata Trust in Cachar Cancer Hospital and Research Centre (Silchar, Assam) leh Research Centre and National Cancer Grid nen thawkhova India Hmarchhak State tina Cancer Awareness atan hmalakna a ni. Rally hi Pachhunga University College thleng neih niin, hetah hian kharna function hman leh a ni.
Health Minister chuan India hmarchhak state-ah leh a bik takin Mizoramah Cancer natna hluar zia kan hre tlangin, hemi kawnga hmalak a tul thu hi inhrilh fo tawh thin in kan chhunzawm zel pawh a ngai a ni, a ti a. Chutihrual chuan inhrilhhriat ah duhtawk mai lovin, mitinin cancer do kawnga tih leh tih loh tur kan hriat ang ang te hi a taka kan nunpui theuh a pawimawh in a tul takzet tawh a ni, a ti. Run and Ride Rally chuan rah tha a chhuah a beisei thu sawiin Minister Pu Lal Thanzara chuan a sawi a; hemi atana India Hmarchhak state zawng zawng tlawhchhuak tura biker thawkchhuakte chu an kal leh zelna turah duhsakna a hlan bawk a ni.
Vawiin Rally-ah hian state pawn atangin biker 30 chuang lo kalin, school naupangte leh PUC NSS Unit-te leh Assam Rifles, Mizoram Home Guards leh CRPF te bakah Health & Family Welfare Department atangin leh tlawmngai pawl dangte atangin an tel a ni.
March 12 atang khan state hrang hrangah he rally hi neih tan a ni a. Tezpur, Assam atanga tan niin, Aizawl atang hian biker-te hian state hnuhnung ber atan Agartala, Tripura an pan leh dawn a, campaign hian tun thla ni 22 thleng a awh dawn a ni.
