Vawiin khan District Information & Public Relations Office building thar chu Pu David L.Thangliana, I&PR Director-in a hawng.

Office building thar hawngtu Director chuan Mamit khawtlang hruaitute leh a mipuite'n I&PR min duhsak avanga Building thar nei thei kan ni a ti a. Mamita I&PR chu Staff tlemte nimahsela Mamita Sorkar hmalakna hrang hrang bakah pawl hrang hrangte hmalakna leh hnathawh mipuite hriata puangdarhtu an ni a ti a. Mizoram Sawrkar hmalakna pholanna  Mizoram Hmasawnna Lamtluang (MHL) tihchhuah thin chu lo ngaihvena an hmalaknate pholang turin a sawm a ni. Mamit-a sawrkar Department hrang hrangte chu Media committee din thar turin a chah bawk a ni.

Pu David L.Thangliana chuan rinawm leh tha taka hna kan thawh chuan kan hnathawhna tur leh kan mamawhte Sorkarin min ngaihsak em em reng dawn a ni a ti bawk.

He hunah hian Pu Jacob Lalawmpuia, Addl.DC Mamit District pawhin thu sawiin I&PR Department Building thar hawn a ni ta chu a lawmpui thu a sawi a. Information Department-te nen chuan inzawmna thuk tak neia kal tlang an nih thu a sawi a. Thawhhona tha tak an neih chu hmalam hunah pawh chhunzawm zel an duh thu a sawi.

Pu C.Lalramdinzela, President, MJA Mamit pawhin thu sawiin I&PR Department leh MJA te chu Department khat ang maia thawkho an nih thu sawiin mamawh an neihte pawh pachan chang taka an ngaihtuah zel thinnaah lawmthu a sawi a. Vawiin Building hawn theih a nihna tura sul lo sutu Officer lo awm hmasate chungah lawmthu a sawi bawk a ni.

Pu PC. Lalthanzuala, vawiina hawn tak I&PR Building satu pawhin thu sawiin I&PR building sak hna hi Ni 23/5/2011-ah thawh tan a nih thu leh Ni 12/5/2015 - ah sak zawh a ni a. Building sak nana senso zawng zawng hi Cheng Nuai 127 a nih thu a sawi a ni.

Vawiina Building thar hawnna Programme hi Pu C.Lalnunkima, MIS, Deputy Director, I&PR-in a kaihruai a. Pu Paul Rokima DIPRO, Mamitin lawmthusawina a nei.

Pu David L. Thangliana, Director I&PR hi MJA Mamit te nen inkawm hona tha tak neiin MJA Press Club sak mek chu a hmunah a tlawh bawk a ni.