Vawiin khan Kolasib District Chief Medical Officer Dr. Lalhlimpuia kaihhruaina hnuaiah District task force for urban immunization (DTFUI) chu CMO pisa ah an thukhawm.

Thutkhawm ah hian March ni 13 atanga ni 15 inkara zenghri danna; Intensified Pulse Polio Immunization (2nd round) pek chungchang thlirletna neih a ni a, hetah hian Kolasib District a kum 5 hnuailam naupang 9390 pek tum atangin naupang 8913 (94.9%) te hnenah zenghri danna pek a nih thu tarlan a ni a, za a za pek an ni theiloh na chhan ni a tarlan chu leilet enkawltu vai fate (floating poulation) an haw /awmloh vang a ni. Report in a tarlan danin India hi zeng hri awm tawhlohna rama puan ni mahse khawvel ram thenkhatah zeng hri hi a la awm avangin khawvela atanga umbo a nih hma chu India ramah pawh zeng hri danna hi pek zel tur a nih thu tarlan  ani.

Hemi bakah hian Sentut leh zerman sentut laka invenna tur measles Rubella Vaccine Campaign (MRVC) chungchang thlirhona neih bawk a ni a, hei hi WHO lamin Kolasib District inpuahchahna kalpui dan an endik meka, pawm a nih chuan April ni 16 khian Campaign hi neih tur a ni. He Campaign ah hian School Session site 149, Outreach (Anganwadi, Sub Centre) Site 58 hnuaiah naupang thla 9 atanga kum 15 inkar mi 26666 te hnenah sentut danna pek tum a ni a, hei hi Kolasib District mihring awm zawng zawng atangin 29.8% a ni.

Sentut danna (MR Vaccine) hi him tak a ni a India ram State dang lo inpek tawhna ah te pawh Vaccine inpek avanga harsatna  thleng report tur a awmloh thu tarlan a ni a, chuti chung chuan Vaccine inpek avanga harsatna (Adverse Effect following Immunization/AEFI) a thlen hlauh takin a enkawl/chiu dan tur inhrilhhriatna neih nghal a ni, hemi ti tur hian Medical Officer te leh Health Worker te chu training pek an nih tawh thu tarlan bawk a ni.

Thutkhawmah hian Health Department a hotute bakah Education Department leh Social Welfare Department atangin District thuneitute an tel a ni.