31/2023-2024

Saitual, 5th April 2023: Health & Family Welfare Minister Dr. R. Lalthangliana chuan nizan khan Saitual District Hospital a tlawh a. Minister hian Chief Medical Officer (CMO) pisa sak mek chu enfiah nghalin, District Hospital thawktute nen inkawmhona hun hlawkthlak tak an hmang bawk.

Minister hian Saitual District Hospital chu hmun laili leh remchang taka awm a ni tiin, tawhsual tawk leh intipalh hrang hrang ten an pan khawm nasat a ni tih a hriatpui thu a sawi a. Thawktuten a hnena mamawh an thlen hrang hrang – physiotherapy, endoscopy leh ECG khawl tharte chu CSR sum dil an hmuh hunah a ngaihtuahsak tur thu hrilhin, an mamawh hrang hrang te chu ‘requirement’ siama Health & Family Welfare Principal Director hnena thlen turin thurawn a pe bawk a ni.

Health Minister hian World Bank sum hmanga Saitual District CMO pisa sak mek chu a enfiah nghal a. District thar pathum – Khawzawl, Saitual leh Hnahthialah te District Hospital cheng nuai 1700 theuh senga sak a nih tur thu sawiin, Saitualah pawh bultan thuai anih a beisei thu a sawi bawk a ni.

Health Minister hi H & FW Principal Director Dr. PC. Lalramliana, DHS Director Dr. Vanlalsawma leh NHM Asst Engineer Er. C. Zothantluanga ten an tawiawm a. Saitual District Hospital ah hian Medical Officer Dr. Lalmalsawma, Dr. V. Lalhmachhuana leh thawktu dangten an lo dawngsawng a ni.