30/2023-2024

Ngopa, 5th April, 2023 : Nimin khan Jubilee Hall, Ngopa-ah 'kum 2022 chhunga Mizoram khawpui fai ber inelna' a lawmman pakhatna dawngtu Ngopa khua chuan ropui taka lawmna hun an hmang.

He hunah hian khuallian Dr R. Lalthangliana, Health Minister chuan Mizorama khawpui fai ber nih chu thil harsa tak a ni tiin, Ngopa khua chu chhuanawm a ti a, an thawhrimnaah fakawm a tih thu a sawi. Health Minister chuan faina leh hriselna chu inkungkaih tlat a ni tih sawiin Lengteng bialtu MLA Dr.L.Thangmawia thahnemngaihna fakawm a tih thu a sawi bawk.

Lang thei lo faina chu rilru hrisel a nih thu sawiin khuallian chuan, rilru hrisel leh thianghlim chu Pathian lawm zawng a ni a. Ngopa pawh, an khua a fai mai bakah, rilru fai leh thianghlim pu zel tura chahin, Mi dang tana hnawk sak lo, midang tana malsawmna ken tlat hi faina hian a kengtel nghal a ni. Midangte tan luang chhuak nun neih hi Pathianin nung tura min duh dan chu a ni, a ti bawk.

Health Minister chuan "Kum 2020 kumah covid-in nasa takin min nuai a, covid chu khawvela nunna suat tam bertu niin nuai hlir nuai 66 velin nunna an chan a. Mizoram pawhin kan tuar nasa hle a, task force, sorkar, kohhran leh mimal thlenga kan thawhhona Pathianin mal a sawm a ni. Covid vangin vawiin thlengin sorkar hna lak min la nghawng zel a ni tih hria ang u, mahse, tan kan la zel ang. Ngopa CHC building sak thar hna pawh kan hna hmasa tur a ni ang. Mizoram hian kum 20 zet Dental Doctor kan la tawh lo a, hman ni lawk khan tlem a zawng kan la thar a, chu chu Ngopa-ah hian kan dah tel a ni," a ti. Mizoramin Super Speciality Doctor kan la mamawh tam tur thu sawiin, tun hnaiah Mizo pakhat an nei thar chu lawmawm a ti hle a, he lam kawngah pawh Mizote invawr sang zela tan la sauh sauh turin kalkhawmte a fuih a. Ngopa CHC-ah Dental chair a dah tur thu a sawi bawk.

Khualzahawm, Dr.L.Thangmawia bialtu MLA pawhin vawiina hun an hman theihna tura thahnemngai taka buaipuitu, Ngopa Welfare Committee chungah lawmthu a sawi a, Ngopa mipui thawhrimna kuhmunah bialtu MLA chu a par ve chauh thu te, Ngopa khua hi Town a nih theihna tura hma an lak dan te, cheng nuai 3000 senga Saitual to Saichal road tuna an blacktop pawh, a MLA tirh atanga a vei thu leh an hmalakna chu Pathianin mal a sawmnaah lawmthu a sawi a.

Kum hnih chhunga khawfai pahnihna atanga pakhatnaah an inhlang kai thei chu lawmawm a tih thu a sawi bawk. Covid vangin Minister leh MLA-ten an duh anga hna an thawh theih loh thu leh hripui leng karah pawh hna tam tak an thawh thu a tarlang a. Lengteng constituency thalaite tan Ngopa-ah Youth Development Centre din tawh te, Ngopa chu Mizorama dawnfawh thar tam ber khua a nih dante a sawi bawk. Sorkar hmasain SDO office a hming maia an kalpui pawh tunah chuan hawn mai theiha peih anih thute tarlangin, Higher secondary school-ah science leh commerce zirna an hawn belh tawh thu te, Ngopa khaw chhunga hma an lak tawh leh hmalak mek hrang hrang te, JJM hnuaia Ngopa tui lak dante a sawi bawk. Dr.L.Thangmawia chuan, KTP general conference an thlen hma ngeia khaw chhung development hrang hrang mamawh leh thawh turte a sawi a. MLA fund-a Ambulance an lei tawh thute a sawi bawk a ni.

He hun hi Pu V.Lalengkima VCM Chairman, TS & CC chuan a kaihruai a, Rev.E.Ramchullova, Ngopa Pastor bial, PCI chuan hunserh ahmang a.

Pu Vanlaltanpuia SDO (C), Nodal Officer, Pu H.Lianzela Director, UD & PA Dept. Er.H.Lalduhkima, Director, PMU, PHED leh Ngopa Welfare atangte in thusawi ngaihthlak a ni bawk.

Minister hi Dr.PC.Lalramliana Principal Director, H & FW; Dr.Vanlalsawma Director, DHS; Pu B.Zoramchhana Asst.Director, C & I (Commerce Wing) leh Er. C.Zothangtuanga Asst.Engineer, NHM-ten an tawiawm a ni.

Health Minister hian Health Sub-Centre Saichal, Hliappui leh Pawlrang Health & Wellness-ah an hlan kai takte chu a tlawh nghal a. Harsatna hrang hrang leh mamawh an neihte chu zawtin theihtawpa hma an lak zel tur thu a sawi. Health & Wellness a hlankai takte hi a nih dan tur angin an thawk em tih a enfiah nghal a ni. Ngopa CHC chu tlawh leh nghalin damdawi chi hrang hrang a pe a, Hospital sak thatna tur hmun hma an en ho nghal a, Dr.C.Lalhmingmawii, Medical Officer leh thawktu dangten an lo dawngsawng a ni.