No.4460/2021-2022
Aizawl, 30th March, 2022 : Health Minister Dr R. Lalthangliana chuan vawiin khan sawrkar laipuia Ayush, Shipping & Waterways Minister Sarbananda Sonowal chu a pisa ah hmu in tunhnaia Mizorama a lokal a, Ayush hospital leh thildang dinna tur atana lungphum a rawn phum chu tihlawhtling rang turin a ngen nawn leh a, heimi chungchang hi hun reilote chhunga chinfel thuai an inbeisei thu Union Minister hian a lo hrilh a ni. Hei bakah Dr.Thangtea hian thenawm ram Bangladesh nena insumdawn tawnna atan leh zin veivahna atana mipui nawlpuiin an hman tangkai theihna tur Darzokai-Kawlchaw (Chhimtuipui) leh Khawthlangtuipui, Bangladesh ramri dep a awm chu mihring leh bungraw phur theihna lawng chi khat – River Cruise Vessel project a siam turin Union Minister hnenah hian a thlen bawk a, Pu Sonowal chuan a changtu Chairman hnenah uluk deuh zawka lo enfiah tira hmalak dan kawng ngaihtuah tura hrilh a lo tiam a ni.

Dr. R. Lalthangliana hian Ministry of Education Secretary (Higher Education) K. Sanjay Murthy leh Addl Secretary (Higher Education) Vineet Joshi te leh official dang pawimawh tak tak te vawiin vek khan inkawmhona (meeting) a neihpui a, he inkawmhona ah hian Mizoram chhim lampang tana Mizoram University Southern Campus chu a rang thei ang bera kalpui turin a sawipui nawn leh a, January 27, 2020-a phalna awm tawh si beisei aia an muang deuh ni a a hriat thu sawiin, Official-te hian Mizoram University te nen tang tlanga hma an lak ho mek chu chak zawka an kalpui mek thu an lo hrilh a, theihtawp an chhuah zel tih an sawi a ni.

RUSA hnuaia teaching faculties (Asst. Proffesors) mi 70 te hlawh, nikum 2021 April atanga vawiin ni thlenga la sanction loh chu a ngaihmawh thu Minister hian thlen nawn leh bawkin, Ministry of Finance lamin an tihfel ngai ve tur an la tihfel loh avanga tlai a nih thu Ministry of Education (Higher Education) Secretary hian sawiin, hei pawh hi chinfel ran theih thuai an inbeisei tih Minister hi an lo hrilh a ni.

RUSA -3 rang taka kalpui tul a tih thu Minister in a thlen pawh thla khat chhung vela hei hi peihfel an inrin thu an lo hrilh a, Minister hian he RUSA-3 hi New Education Policy nena inmil turin guidelines leh a kalpui dan tur hi her rem theih hram ni sela tih a thlen bawk a, hei hi official-te hian lo bengkhawn hle in, lo ennawn leh a Minister thu rawn anga kalpui dan tur an lo zawng dawn tih an lo hrilh a ni.

National Institute Technology (NIT), Lengpui a kum engemawzat kal ta a bultan nisi vawiin ni thlenga harsatna kawng hrang hrang avanga hmalakna khaihlak rei lutuk chungchang chu a thlen bawk a. Hei pawh hi awmze neia a kal theih thuai an beisei thu Minister hi an lo hrilh a ni.

Dr. R. Lalthangliana hian Health & Family Welfare Ministry tlawhin Economic Adviser (NHM) Indrani Kaushal leh official pawimawh dangte nen inkawmhona hunt ha tak an nei bawk a. Health Miniser hian Mizoram in kan mamawhna a san em avangin NHM second instalment cheng vaibelchhe 40 tal a rang thei ang bera release turin a ngen nawn leh a, hei bakah hian PM-ABHIM account chu a rang thei ang bera rawn release vat turin a ngen bawk a, a thu thlen hi lo ngaihpawimawh sakin, a rang thei ang bera chinfel a nih tur thu an lo tiam a ni. He meetingah hian Dr.Kavitha, Scientist, ICMR chu Health Minister a koh angin a tel bawk a, ICMR in Covid-19 kan hmachhawnna kawnga Mizoram tana thil tam tak an tihsakna ah Minister hian lawmthu ICMR chungah a sawi a. UNICEF-in ICMR kaltlanga RTPCR khawl pariat (8) an rawn pek tur chu tun thla thar April ni 1, 2022 hian Zoram Medical College, Aizawl, thleng hman vek turin rawn thawn an tum a, an inruahman mek tih an lo hrilh a ni.

Vawiin chawhnu vek hian Dr.Thangtea hian Dr. Vinod K. Paul, Adviser (NE), Niti Aayog chu a pisa ah kawmin, Civil Hospital, Aizawl tana Nephrology Department dinna tur leh Civil Hospital tana theihtawp chhuah a tan a lo lak thin tawhna ah lawmthu a hrilh a. Dr. Vinod hian Boeing India-in CSR Fund kaltlanga MRI khawl Rs. 6-7 crore man inkar an pek tur pawh ruahmanna peihfel tep a nih thu chu Minister hi a lo hrilh a ni. He meetingah hian Ms. Praveena, Director CSR Boeing India pawh a tel a, he MRI Machine pek tur atana tihfel ngai ang ang te theihtawp chhuaha hmalak mek zel a ni tih Minister hi a hrilh bawk a ni. Dr. Thangtea hian Mizoram district hospital zawng zawng leh PHC (61 nos.) te tana Portable X-ray machine leh ECG Machines bakah testing laboratory khawl bun chungchangte a sawipui bawk a, hei hi Adviser leh Boeing lam hotute chuan an lo bengkhawn sak hle a, mumal deuh a ziaka thehlut turin Minister hi thurawn an lo pe a ni.

Vawiin a Mizoram Health Minister in Union Minister of Ayush leh ministries hotu hrang hrangte a hmuhna ah hian Pu Alexander V Chongthu, MCS, Addl. Resident Commissioner, Mizoram House, New Delhi leh Dr. Hmingthankimi, Consultant, NHM, Mizoram ten an tawiawm ani.

Attachment

  • Loading attachment...