No.4461/2021-2022
Aizawl the 30th March, 2022 : Tunlai hian Cybercrime chi hrang hrang- phone call leh internet kaltlanga inbumna a hluar em avangin SDPO/PRO Lunglei chuan ni 30 March,2022-ah a hnuai a mi ang hian thuchhuah a siam.

Mi tam takin thilpek leh sumdawnna lem avangin pawisa an chan thlawn tawh a, mi tam tak chu bank account atanga pawisa rukchhuah sak an ni bawk a ni. Tin, hei bakah hian zahmawh rawng kai thlalak leh thil dang hmuh nuam lo tam tak Social media-ah a darh nasa hle. Hemi laka mitin te kan him theih nan heng a hnuaia mite hi zawm hram turin kan in ngen a ni e.

1) Bank hian phone call leh internet kaltlangin an customer te bank account, ATM card leh net banking chungchang te an zawt ngai lo a. Online-a siamtha tur emaw tidanglam tur phei chuan an hrilh ngailo brim hrim a ni. Chuvangin, i hriat ngailoh number atangin Bank Manager nia in sawiin i bank account emaw ATM card chungchangah a thi dawn tiin emaw siam danglam ngai chhuanlama account number, ATM card number, CVV number te a dil che emaw online a siam tha tura an ti che anih chuan awih miahloh tur a ni, phone pawh dah hmak tur a ni.

2) I mobile phone ah SMS-in One Time Password (OTP) number alo thleng a nih chuan tumah hrilh suh. Tin, OTP hi a thleng sual ngailo. I mi briatlohin a OTP kha i phone-ah an rawn thawn sual anga sawi a, a dil che a nih chuan hrilh miah loh tur, i account atanga pawisa rukchhuah an tum tihna a ni.

3) SMS emaw Email hmanga Lottery man thu emaw Hna (Job offer) emaw Thilthlawnpek (Gift) emaw i dawng a nih chuan inbumna a ni tih hria la, bawhzuiin buaipui zui suh ang che. Pawisa phei chu thawn ngai suh ang che.

4) Social Media a i thian siam chawp, ramdang miin thilthlawnpek rawn pek che a tum a nih chuan inbum tumna a ni tih hriain, hnar zel ang che. A rawn thawn lui che ni anga a insawi a nih phei chuan inbumna a ni tih hre nghal la, sum engmah a tlanchhuahna turin pe hek suh ang che.

5) I Bank account chungchangah buaina i nei emaw hriatchian duh i nei emaw siamthat ngai a awm a nih chuan account i neihna bank-ah nangmah ngei kalin thu i zawtfiah thin dawn nia.

Cybercrime tuartu (victim) i nih chuan i awmna atanga hnai ber Police Station-ah Complaint (FIR) thehluh mai tur a ni. I tan Police Station pan a harsat chuan toll-free cybercrime helpline number 1930 ah phone theih a ni a, hei bakah hian National Cybercrime Reporting Portal (www.cybercrime.gov.in) ah online a complaint thehluh theih a ni bawk.