Vawiin chawhnu khan Sazaikawna NRHM hnuaia Urban Primary Health Centre (UPHC) sak chu Health & Family Welfare Minister Pu Lal Thanzara’n a hawng.

Pu Lal Thanzara chuan Saizakawn mipuite chu an vannei tiin, a lawmpui thu a sawi a. UPHC-a thawktute pawhin mawhphurhna lian tak an nei tiin, khawpui pawn lama an anpui Centre dang (PHC leh Sub-Centre) te entawn tlak khawpin, hnathawh nasat kawngah te, Home Visit leh Records leh Reports fel kawngah te, hna thawhnaa uniform hak leh Centre vawnfai kawngah te hma hruaitu nih tling turin a chah a ni. Minister chuan sawrkarin mipuite harsatna a hriatpuiin, ngaihtuahna a seng reng a ni, a ti a. Kan ram mipuite hi kan hrisel loh a, ei leh bar a kan intodelh chuang loh chuan ram nuam a ni dawn lo a ni, a ti. Remna leh muanna hnuaiah hmasawnna a kal chho mek zel a, mipui hriselna turin department pawhin theihtawpa hma a lak reng thu sawiin, sawrkar hmalakna te tawiawm turin a sawm nghal a ni. Khuallian chuan Lunglei District Hospital tan X-Ray khawl dah a nih thu te, Dialysis khawl 2 bun a nih thu te, CT Scan dah tura Tender chhuah a nih thu leh Eye Ward-a Operation Theatre peih fel tep a nih thu te sawiin, Trauma Centre pawh sa tura ruahmanna a awm mek thu a sawi a ni. Falkawn Referral Hospital tichangtlung turin NEDP hnuaiah cheng vaibelchhe 28 dah a nih thu sawiin, Medical College pawh din tum a nih avangin tunhma aiin doctor indaihlohna a na lehzual tih Mizo mipuite hriatpui a duh thu a sawi bawk a ni. UPHC hawn tak chu a khaw mipuiten neitu rilru pu a, tha taka enkawl a, a thawktute pawh kawng tinrenga tanpui turin a chah a ni.

Bialtu MLA Pu Chalrosanga Ralte pawhin Lunglei West-a mipui tana rotling an nei thei chu a lawmawm tak zet tiin, hmasawnna hi hmuh turin a awm a ni, a ti a. Sawrkar tihtauh khuma, lungawi lohna lan tira in nawr kal hi kan tih tur a nilo a, thil tha kan duh a nih chuan dawhkan kil ho in kan sawi tlang tur a ni, a ti. Kan mamawh leh harsatna te kan sawi tlan hian kawngro a su zawk in, hmasawnna pawh kan hmu chak zawk ang, a ti bawk.

Principal Director, H&FW Department Dr. K. Ropari chuan keynote address pe in, hmun zawn a harsat thu sawiin, hmun min petu awmlo se sawrkar programme hi a kal thei dawnlo a ni , a ti a. Er. Vanlalzuala Chenkual, Sr.EE, H&FW Department chuan technical report a pe a, UPHC sak hna hi June ni 19, 2015-ah tanin cheng 74,99,891.00 senga October ni 10, 2016-a sak zak zawh a nih thu a tarlang a ni. Lunglei CMO Dr. VLMS Dawngliana’n lawmthu sawiin he UPHC hawnna inkhawm hi a khar a ni.