Forward Linkage Scheme hnuaia Aizawl Civil Hospital tihchangtlunna tura NPCC-in a pawm tawh hna tam tak zinga pakhat Semi Private Room Block & General Ward, Aizawl Civil Hospitala sak tur chu tukin zing dar 7:00 khan Health Minister Pu Lal Thanzara’n lung a phum.

Minister chuan thutawi sawiin Civil Hospital hnuaia department hrang hrang te Falkawn lama sawn phei an ni mek chungin Civil Hospital chu a tul anga thuam changtlun zel a nih thu a tarlang a. Trauma Centre leh quarters sakna turte pawh sum awm vek tawhin kumin chhunga bultan tum a nih thu a sawi lang a. Falkawna Medical College dinna turah seat 100 siam tur leh hostel seat 100 siam turin chak taka hma lak mek a nih dan te a tarlang bawk. Health Department chuan tihdam rawngbawlna theihtawpa kalpui zelin tuna sak thar turah pawh kum upa lam te enkawlna dah tura ruahman a nih dan te a sawifiah bawk.

Inkhawm hun tawi, Health Department Principal Director Dr K.Ropari kaihhruai ah Pu Vanlalzuala Chenkual, Sr. E.E., Health & Family Welfare Department chuan technical report a pe a, contractor Pu R.Sangkhuma niin a building thuthmun 298.50 sq. mtrs ah chhawng 5-a sak tur a ni a, sum sen tura ruahman chu Rs 7,54,60,000 /- a ni. Cabin awm mekna bula sak thar turah hian general ward, cabin, consultation room, library / seminar room, autoclave room, CT Scan, motor parking etc te dah tura ruahman a ni. December 2014 ah sak tan niin thla 18 chhunga sak zawh tura ruahman a ni.

Semi Private Room Block & General Ward lungphum phumna ah hian Dr Lalbiakkima, Director, Hospital & Medical Education, Dr Rosangluaia, Medical Superintendent, Dr K.Lalbiakzuala, Director, NHM leh Health Department hotu dang te an tel a ni.