2996/2022-2023

Aizawl 8th December 2022: Vawiin khan Health & Family Welfare Minister Dr R.Lalthangliana chuan Sialsuk Primary Health Center building thar chu khuallian niin a hawng a.  Aizawl South 3 bialtu MLA Prof.F.Lalnunmawia, Horticulture Development Board Vice Chairman ni bawk chu khualzahawm niin, Lawngtlai East  bialtu MLA Pu H.Biakzaua chuan a telpui bawk a ni.

Dr.R.Lalthangliana chuan Sialsuk khua chuan kum 1922 velah damdawi in nei tawhin Mizorama damdawi in nei hmasa ber pawl an nih thu a sawi a. Bialtu MLA, khawtlang leh NGO hruaitu te hmalakna zarah NABARD hmanga PHC sak tur zingah pawh ngaihpawimawh hmasakah Sialsuk chu dah a ni, a ti. Sialsuk chu PHC building thar sak zingah pawh tha ber pawl a ni, a ti a. Khaw dang tan pawh entawntlak a tih thu leh hetiang anga tha vek hi ni thei se a duh thu a sawi bawk. Damdawi in hrang hranga thawktu indaih lohna te chu chinfel thuai a nih a beisei thu Health Minister chuan a sawi a. Harsatna hrang hrang Covid-19, vawk pul hri, raltlan leh ramri buai te vangin duhthusama hmalak theih ni lo mah se, Health Sub Center 300 chuang chu Health & Welness Center ah hlankai ni tawhin, la hlankai loh te pawh sawrkar kum tawp hmain hlankai vek tum a nih thu a sawi a. Primary Health Center te chu Community Health Center ah hlankai chhoh zel tum a nih thu leh Health Sub Center nei lo khua te harsatna phuhru turin Health Clinic khaw 230 ah din a nih thu a tarlang bawk a ni. Sialsuk khaw mipuite chu damdawiin hmunhma thar chu duat taka enkawl tura chahin, sawrkar ram humhalh kawngah hmalakpui turin a ngen bawk.

Khualzahawm Prof F Lalnunmawia chuan Sialsuk khuain damdawi in building thar tha tak an nei thei chu lawmawm a tih thu a sawi a. A bial chhung khaw pali - Chamring, Lungsei, Chawilung leh Saikhamakawn ah te Health Clinic Center din a ni chuan mipuite harsatna tam tak a sutkian dawn thu a sawi a. Heng hmuhma leh staff rawihna tur ngaihtuahsaktu Chief Minister Pu Zoramthanga leh Health Minister Dr R Lalthangliana te chungah lawmthu a sawi bawk a ni.

Pu H.Lalfakzuala, Executive Engineer, H&FW Department chuan technical report a pe a. Sialsuk PHC hi NABARD RIDF - XXV sum, Rs.2,28,68,000 hmangin CB.Engineering Venghlui, Aizawl te sak a ni a. Dt.14.10.2020 ah sa tanin Dt.01.12.2022-ah sak zawh a ni. Building hi chhawng hniha sang niin, 470 sq.m a zau a ni a. Casualty, X-Ray room, Pharmacy, Consultation Room, Operation room, Laboratory, Store room leh toilet te awm tura ruahman a ni.

Health Minister hi bialtu MLA Prof.F.Lalnunmawia, Lawngtlai East bialtu MLA Pu H.Biakzaua, Pu L.T.Kima Fanai, Member, Commerce & Industrial Dev.Board, Dr.T.Lalhmangaihi, Principal Director, H & FW, Dr.Vanlalsawma, Joint Director (P) DHS leh Official dangten an tawiawm a ni.